Historie vun den Johanniterorden
De Johanniter sünd en geistlichen Ridderorden, de in't 11. Jahrhunnert grünnt woor för den Schutz un de Krankenpleeg vun de Palästinapilgers. An de Spitz stund de Grootmester. Ehr Banner weer dat witte Krüüz mit acht Spitzen up en root Feld.
De Hööftsitt vun de Johanniter weer in Akkon, aver na den Fall vun Jerusalem siedeln se eerst um na Cypern un 1310 na Rhodos. De Törken verlangen 1522, dat se de domaals noch törksche Insel verleten un darum togen se um na Malta.
Al in dat 13. Johrhunnert harrn de Johanniter ok in Düütschland Kommenden (lat. commendo = anvertrauen), de ehr von verschedene Landesherrn anvertroot oder schunken woorn. Mehrstens weern dat Kloosterhöve, up de de Ordensbröder un -süstern Landweertschap bedreven, aver ok preesterliche Deenste un Upgaven in de Krankenpleeg övernehmen. In Freesland geev dat ene Reeg vun Kommenden, de sik sunnerlich bi den Diekbo un Küstenschutz verdeent maakt hebbt. De Kommenden in Freesland, t.B. de in Bredehorn, weern de Ballei Westfalen todeelt un den Komtur in Stemmert unnerstellt.
In de Reformatschoonstiet is de Orden upspleten wurrn in en evangeelschen un en kathoolschen Twieg. De evangeelsche Orden heet hüdigendags de Johanniterorden un de kathoolsche Twieg sünd de Maltesers. Dormols trucken de Landesherrn de Kloosterhöve to'n groden Deel wedder in. Dat weer för den Orden ene slimme Tiet, denn he harr jüst de Insel Rhodos verloren un harr darum nich de Kraasch, sik gegen dat Intrecken to Wehr to setten. Eerst 1547 födder de Grootprior vun Düütschland to'n Bispill den Graaf vun Ollnborg up, den Orden de Göder wedder trüggtogeven. 1572 keem dat to enen Vergliek. Graaf Anton I.versprook, an den Komtur in Stemmert 5200 Daler to betahlen un kunn darför de Kommenden as freet Allodium (Grundegendoom) behooln.
1798 woor de Hööftsitt vun den Ordensmester vun de Maltesers na Rom verleggt.
Kiek ook in Internet
[ännern | Bornkood ännern]- Johanniter-Hööftsiet (in hoochdüütsch)
- Johanniter-Unfall-Hilfe e.V. (in hoochdüütsch)
