Hermann Fiebing

Hermann Fiebing (* 17. November 1901 in Märkisch Friedland; † 5. Oktober 1960 in Stood) weer en düütschen Verwaltungsbeamten.

Fiebing is 1901 in Märkisch Friedland boren un hett 1921 sien Abitur in Dramborg maakt. In dat Johr hett he sik denn en Freekorps anslaten. He hett bet 1924 Juristeree an de Universitäten Griepswoold, Freiburg un Berlin studeert. Na dat Studium hett he sien Rechtsreferendariat anfungen. He weer von 1929 af an Avkaat in Flatow un von 1931 af an Notar in’n Bezirk von dat Oberlandsgericht Marienwerder. In’n Juni 1929 is he in de NSDAP rin (Matennummer 172.101). He weer ok bi de SA un hett dat dor bet to’n Brigadeführer bröcht.

Fiebing is na de Machtergreifung in’n März 1933 Landshauptmann in Schneidemühl (Grenzmark Posen-Westpreußen) worrn, weer denn von 1935 bet 1938 Landraad in’n Landkreis Oschersleben (Bode) un von 1938 af an Viezpräsident von dat Böverpräsidium in Hannover. As de Twete Weltkrieg anfungen is, weer he von Anfang September 1939 bet Enn Dezember 1943 mit korte Pausen bi de Wehrmacht, toletzt in’n Rang von en Leutnant von de Reserve. Von Anfang April 1942 af an weer he as Regerungspräsident in’n Regerungsbezirk Stettin insett. 1944 bet 1945 weer he Regerungspräsident in’n Regerungsbezirk Stood. In’n Mai 1945 keem he in Fungenschop, ut de he 1947 wedder free keem. Na siene Entnazifizerung 1949 hett he wedder as Regerungsraad arbeidt. An’n 10. April 1956 hett he den Rang von en Regerungspräsident kregen un is toletzt in’n Wartestand versett worrn. Veer Johr later, an’n 5. Oktober 1960, is Fiebing in Stood doodbleven.