Herbert Wehner

Vun Wikipedia
Zur Navigation springen Zur Suche springen
Herbert Wehner (1966)
Herbert Wehner in Hamborg 1981 (in’n Achtergrund Rolf Meinecke)

Herbert Richard Wehner (* 11. Juli 1906 in Dresden; † 19. Januar 1990 in Bonn) weer en düütschen Politiker vun de KPD (1927-1942) un de SPD (vun 1946 af an). He is vun 1966 bit 1969 Bundsminister for gesamtdüütsche Fragen un achternah bit 1983 Vörsitter vun de SPD-Fraktschoon in’n Düütschen Bundsdag ween.

Wehner is 1927 in de KPD intreden un is Afordenten in den Landdag vun Sassen wurrn. As he in’t Exil möss, höör he to dat Zentralkomittee vun de KPD to. Nadem de Nazis in Düütschland de Macht overnahmen harrn, hett he sik vun 1937 bit 1941 in Moskau in dat Hotel Lux upholen, wat hüdigendags en sunnerlich slechten Naam hett. As dat mit Stalin sien Groten Terror losgung, hett he nix afkregen, man dat gifft Henwiese, he harr annere düütsche Kommunisten ankleit – un unner Umstänn so sien Leven rett´. 1941 is he na Sweden henstüert wurrn. He scholl dor den Wedderstand gegen dat NS-Regimne in Gang bringen. 1942 is he insperrt wurrn un hett dat Enn vun den Krieg achter Trallen in Sweden mitmaakt. To düsse Tied is he ut’e KPD rutsmeten wurrn. Em is vörsmeten wurrn, he harr den Updrag vun de Partei nich utföhrt. 1946 keem he na Hamborg un is dor een vun de groten Mackers vun de SPD wurrn. Vunwegen siene Geschicht is he avers meist in’e tweede Reege bleven, unner annern as stellvertredenden Vörsitter vun Partei un Fraktschoon. He is woll eerst laat een vun de parteiinternen Reformers wurrn, man he hett doch en goden Deel dorto bidragen, datt de SPD sik entwickelt hett vun en Partei for en bestimmte Klientel to en Volkspartei. He bekenn sik to Westintegratschoon, Marktweertschop un Bundswehr (Godesberger Programm). Nadem de SPD 1982 de Macht in’n Bund verlaren harr, hett Wehner Bott geven un sik nich mehr upstellen laten for de Bundsdagswahl 1983. Dor hett he denn ok sien Amt as Fraktschoonsvörsitter mit upgeven. [1]

Belege[ännern | Bornkood ännern]

  1. Herbert Wehner. In: Who’s who.

Weblenken[ännern | Bornkood ännern]

Commons-logo.svg Herbert Wehner. Mehr Biller, Videos oder Audiodateien to’t Thema gifft dat bi Wikimedia Commons.