Heinrich Stuhlfauth

Stuhlfauth (1. v. r.) bi sien 19. Lännerspeelinsatz gegen Italien

Heinrich Stuhlfauth (* 11. Januar 1896 in Nürnbarg; † 12. September 1966 ok dor), ok „Heiner“ nömmt, weer en düütsch Footballdoorhöder. Van 1916 bit 1933 speel he bi den 1. FC Nürnberg, för den he all tosommen 606 Mal in de eerst Mannschap spelen de. Stuhlfauth hett ok 21 Lännerspelen för de düütsch Football-Natschonalmannschap bestreeden un weer tietwies düütsch Rekordnatschonalspeler.

Leven

Jöögd

Stuhlfauth wurr an’n 11. Januar 1896 as Söhn van den Metallarbeiter Karl Stuhlfauth un de sien Fru Babette in Nürnbarg boren. De Familie leev in de Süüdstadt van Nürnbarg. Heinrich Stuhlfauth wull eenig Radrennfohrer wurrn, dat hett hüm sien Vader aber verboden.

Loopbahn as Speler

De eerste Satschoon as Speler weer af 1908 de FC Franken Nürnberg, för de he in den Angreep spelen dee. Wiel de Stammdoorhöder to’n FC Pfeil Nürnberg wesseln dee, wurr Stuhlfauth in’t Door stellt, wiel he de gröttste Speler weer. 1911 wis he ok to den FC Pfeil Nürnberg wesselt, wo he tonächst as Halflinker spelen dee. Nahdem de Stammdoorhöder to dat Militär inberopen wurr, speel de 1,84 m groot Stuhlfauth 1914 ok dor to’n eersten Mal in’t Door.

An‘n 1. Oktober 1916 is Stuhlfauth to’n 1. FC Nürnberg wesselt, wiel sück de FC Pfeil uplööst harr. Dor geev he in’n Oktober 1916 sien Debüt. An‘ 15. Oktober 1915 wurr he aber kört to dat 3. Bayerischen Pionier-Ersatzbataillon in Ingolstadt inberopen, dor allerdings för Armee-Footballspelen freestellt. An’n 14. August 1916 wurr he to de Kraftfohrtüüch-Ersatz-Afdeelen nah Nürnbarg versett. He wurr aber nie an de Front afkommandeert. Af Dezember 1916 hett Stuhlfauth bi de Fohrtüüchfabrik Schmidt, Karl, Nürnbarg, arbeit.

Nah den Eersten Weltkrieg wurr he bi den „Club“ to en van de eerst groot Stars van den düütschen Football. Wiels sien Tiet bi den 1. FC Nürnberg wurr he düütsch Natschonalspeler. Mit sien Vereen wunn he fief düütsch Meestertitel (1920, 1921, 1924, 1925 un 1927) un nehm ok an dat "endlos Meesterschapsendspeel" 1922 deel.

Mit sien 19. Lännerspeel an‘n 28. April 1929 hett he Eugen Kipp as Rekordnatschonalspeler van den DFB aflööst, bleev dat aber blots bit to’n 25. September 1932, as Richard Hofmann sien 22. Lännerspeel maken dee. Stuhlfauth weer bi söss Lännerspelen ok Kapitän van de düütsch Natschonalmannschap.

Sien 21. un letzt Lännerspiel funn in dat Fröhjohr 1930 in Frankfort an’n Main gegen Italien statt (0:2).

1933 hett Heinrich Stuhlfauth sien Loopbahn as Speler afslooten.

1929 bit 1931 weer he all bi den in de Kreisliga Oberpfalz-Niederbayern spelen TSV 1861 Straubing führt. 1932/33 traineer he sowohl de Würzburger Kickers as ok weer Straubing.

Leven nah sien Karriere

Af Midden van de 1930er Johren hörr he den Öldstenraat van den 1. FCN an.

To Anfang van den Tweeten Weltkrieg wurr Stuhlfauth weer intrucken un nehm as Gefreiter an den Polenfeldtoog deel. In’n Krieg wurr Stuhlfauth sien ehmalig Lokal Sebaldusklause bi den Luftangreep up Nürnbarg utbombt. Nah Kriegsenn‘ hett he as Schoolsportlehrer arbeit un führ för dat Mineralöölünnernehmen Shell Football-Lehrfilme vör.

1953 nehm he as 57-Johriger up Inlaaden van den Düütsch-Amerikaanschen Football-Bund an en USA-Tournee van den 1. FC Nürnberg deel. Dorbi wurr he begeistert empfangen un hett de Tournee sülvst as „die Krönung meiner Laufbahn“ betekent.

1956 wurr Stuhlfauth in en Umfraag van den Kicker to’n populärsten düütschen Footballspeler wählt. An‘n 12. September 1966 is Heiner Stuhlfauth an en Hartinfarkt storven.

Stärken

Heiner Stuhlfauth gull neben den Spanier Ricardo Zamora to sien Tiet as en van de best Doorhöder up de Welt.

Van‘n 8. Juli 1918 bit to’n 5. Februar 1922 hett de Club mit hüm kein eenzig van 104 Verbandsspelen verloren. Dat Doorverhältnis in disse Spene weer 480:47.

Een van sien Spezialitäten weer de Afwehr mit Foot; he weer en fröh Vertreder van den „mitspelen Doorhöder“ un wurr van Journalisten ut sien Tiet as „dart Verteediger“ betekent. „Ich bin dem Ball oft zwanzig und dreißig Meter entgegengelaufen, indem ich den Ball weg geschlagen habe. Ich würde das jedem Torwächter empfehlen“, so de Raat van Stuhlfauth. Markenteeken van Stuhlfauth weern sien grau Pullover un sien markante Schiebermütz.

Ehrungen

1960 kreeg Stuhlfauth de Bürgermedaille der Stadt Nürnberg un 1966 de Ehrennadel van den DFB. Tosätzlich wurr he to’n Ehrenspeelführer bi den 1. FC Nürnberg nömmt.

2006 wurr de Block 18 in dat Nürnbarger Easycredit-Stadion nah hüm nömmt un dat Vereenslokal van den FCN am dat Vereensgelände drocht ok sien Naam.

2008 wurr Heinrich Stuhlfauth in de Hall of Fame vun den Düütschen Sport upnommen. In Nürnbarg is ok en Straat nah hüm nömmt.

Weblinks

• Heiner Stuhlfauth up weltfußball.de
• Heiner Stuhlfauth up dfb.de
• Heinrich Stuhlfauth up glubberer.de
• Porträt, Daten un Biografie van Heinrich Stuhlfauth in de Hall of Fame vun den Düütschen Sport