Hans Helferich

Vun Wikipedia

Hans Helferich (* 13. Dezember 1891 in Griepswoold; † September 1945 in Posen) weer en düütschen Verwaltungsbeamten.

Helferich is 1891 as Söhn von en medizienschen Universitätslehrer in Griepswoold boren. He hett Juristeree studeert un is 1914 Referendar an en Kamergericht worrn. He müss 1914 denn as Soldaat Deenst in’n Eersten Weltkrieg doon. 1918 is he Gerichtassesser worrn un hett 1920 sien Dokter maakt. Von 1920 af an hett he in dat Finanzministerium von Prüßen arbeidt un is 1923 Finanzraad worrn. He is 1925 as Nafolger von Felix Rötger kommissarsch Landraad von’n Kreis Horborg worrn. In’n Februar 1926 is he denn richtigen Landraad worrn un dat bet 1929 bleven. Sien Nafolger weer Hans von Hoffmann.

1929 is he Verbandsdirekter von’n Danziger Raiffeisenverband un Direkter von de Landwirtschaftliche Bank in Danzig worrn. 1932 kreeg he den Posten as Oberregerungsraad bi de Bo- un Finanzdirekschoon Berlin un hett denn in dat Rieksarbeidsministerium un in dat Rieksministerium för Eten un Bueree arbeidt.

He weer von 1932 af an Präsident von de Prüüßsche Zentralgenossenschaftskass in Berlin, ut de an’n 21. Oktober 1932 de Düütsche Zentralgenossenschaftskass worrn is. He weer bet 1945 Präsident von de Düütsche Zentralgenossenschaftskass. As an’t Enn von’n Tweten Weltkrieg de Russen Berlin innahmen hebbt, hebbt se Helferich fastnahmen un in en Lager na Posen bröcht. Helferich is dor in’n September 1945 na en Bloodvergiftung doodbleven.

He weer nich verheiraadt.