Hackenlopers

Vun Wikipedia
Zur Navigation springen Zur Suche springen
Hackenlopers
Systematik
Stamm: Liddfööt (Arthopoda)
Ünnerstamm: Tracheendeerter (Tracheata)
Böverklass: Sessfööt (Hexapoda)
Klass: Insekten (Insecta)
Ünnerklass: Fleeginsekten (Pterygota)
Böverornen: Neeflunken (Neoptera)
Ornen: Hackenlopers (Mantophasmatodea)
Wetenschoplich Naam
Mantophasmatodea
Zompro, Klass, Kristensen & Adis, 2002
Hackenloper ut Süüdafrika

De Hackenlopers (Mantophasmatodea) sünd en Ornen man de Insekten. Se sünd eerst 2002 beschreven wurrn un freet bloß man Fleesch.

De Naam[ännern | Bornkood ännern]

De Naam Mantophasmatodea is tohopenfaat ut de wetenschopplichen Naams vun de Biddhaupeer (Mantodea) un de Wanneltwiege un Wannelblöder (Phasmatodea). Dat kummt dorvun, datt de Hackenlopers bi’n eersten Henkieken utseht, as wenn se ut düsse beiden Ornens tohopenmuddelt wurrn weer. Vunwegen datt dat leste Lidd vun de Fööt (dat Arolium) meist alltied hoochholen warrt, weert de Deerter ok Hackenlopers nömmt.[1]

Kennteken[ännern | Bornkood ännern]

All Hackenlopers leevt sunner Flunken. Ehr Kopp steiht na unnen hen un dor sitt lange Föhlspriete an.[2]De dree Segmente vun de Bost (Thorax) staht mit den achtersten Rand en beten over dat neegste Segment overweg. De Vör- un Middelschenkels sünd wat dicker un dor sitt up de Binnensiet Dornen an. De Fööt hefft fiev Le’e un up dat drüdde Lidd sitt boven en dreekanten Utlöper an. Twuschen de Krallen sitt dat Arolium, wat man tämlich groot is, un dor bovenup sitt en Bössenkranz. Dat Achterlief besteiht ut tein Segmente. De Steertfadens (Cerci) sünd bi dat Heken grötter un nich liek lang. Se bestaht ut bloß een Segment. De ganzen Deerter weert twuschen 1,5 bit 4 cms lang. Dor sünd de Seken jummers grötter bi as de Heken.

Wo se vorkamen un leven doot[ännern | Bornkood ännern]

En Hackenloper siene Larve

All Aarden de hüdigendags noch vorkamen doot, leevt in Afrika sien Süden, in Namibia, Tansania un Süüdafrika. Freten doot se lüttje Insekten, de hoolt se mit Vör- un (unner Umstänn) Middelbeen fast. Vunwegen de Kommunikatschoon in de egen Aart un sunnerlich, wenn se en Partner söökt, trummelt se mit dat Achterlief up’e Eer. An dat Beven vun den Unnergrund verscheelt sik de Geslechter un de Aarden.[3]Dat Seken spöört dat Beven, wat vun’t Heken utlööst warrt un fangt ok an, to trummeln. Dor löppt dat Heken denn hen un finnt sien Wief. De Paarung duert dree Stunnen bit hen to en poor Dage. Nadem dat Sperma afgeven wurrn is, jumpt dat Heken fix weg, so wiet, as dat man geiht (bit hen to 10 cm) un bringt sik so in Sekerheit. De Eier weert mit Sand un Sekret tohopenbackt un in’e Eer afleggt. Bi Floot, man ok, wenn dat dröge is, könnt de Eier en tiedlang utholen. Den drögen Sommer lang töövt de Eier, un de Nymphen kruupt eerst in de neegste Regentied ut. In en poor Weken treckt se fievmol de Huud ut. [2]. Dat Arolium warrt normolerwiese vun’e Eer afstreckt, man bi Gefohr, starken Wind oder Regen warrt dat dalreckt up’e Eer. So könnt de Deerter beter lopen. [4][5]. Hackenlopers sünd Insekten mit en unvullstännige Metamorphose, de sik nich verpopppen doot (hemimetabole Insekten).

Wie se funnen wurrn sünd[ännern | Bornkood ännern]

De Ornen is eerst in dat Johr 2002 vun Oliver Zompro un Joachim Adis (beide Max-Planck-Institut for Limnologie in Plön), Klaus-Dieter Klass (Senckenberg Naturhistorische Sammlungen Dresden) un Niels-Peder Kristensen (Kopenhagen) upstellt wurrn. Dor is dat de eerste Ornen mank de Insekten, de siet 1914 nee beschreven wurrn is.[6]

Kiek ok bi[ännern | Bornkood ännern]

Belege[ännern | Bornkood ännern]

  1. Online-Zeitung der Universität Wien
  2. 2,0 2,1 Hockman D., Picker M.D., Klass K.D. & Pretorius L: Postembryonic development of the unique antenna of Mantophasmatodea (Insecta). Arthropod Structure and Development 38: 125-133, 2009
  3. Eberhard M.J.B. & Picker M.D: Vibrational Communication in two sympatric species of Mantophasmatodea (Heelwalkers). Journal of Insect Behavior 21: 240-257, 2008
  4. APA Presseaussendung
  5. Eberhard M.J.B., Pass G., Picker M.D., Beutel R., Predel R. & Gorb, S.N: Structure and Function of the Arolium of Mantophasmatodea (Insecta). Journal of Morphology 270: 1247-1261, 2009
  6. Klaus-Dieter Klass, Oliver Zompro, Niels-Peder Kristensen und Joachim Adis: Mantophasmatodea: Mantophasmatodea: A New Insect Order with Extant Members in the Afrotropics Science 296: 1456–1459, 2002

Weblenken[ännern | Bornkood ännern]

Commons-logo.svg Hackenlopers (Mantophasmatodea). Mehr Biller, Videos oder Audiodateien to’t Thema gifft dat bi Wikimedia Commons.