Hämolymphe

De Hämolymphe is en Lieffletigkeit vun de Liddfööt (Arthropoda) un vun vele Weekdeerten (Mollusca), dat an Steed vun’t Blood in de Liefhöhl zirkuleert. De Hämolymphe bargt Plasma un de Bloodzellen. Ünner annern deent se to’n Transport vun Nehrstoffen, to’n Utgliek vun de Temperatur un to’n Versluten vun Wunnen.

Hämolymphtransport

Bi’n Dwersnitt dör Insekten kann een dree Afsnitten ünnerscheden, neemlich den Perikardialsinus, den Perivisceralsinus un den Perineuralsinus.

In’n Perikardialsinus sitt dat Rüchfatt, wovun de abdominale (buuksietige) Deel as Hart betekent warrt, dat caudal slaten is. Dat Abdomen nimmt de Rull vun en Druckpump in. An dat Hart slutt sik de Aorta an. Dit Rüchfatt (oder Dorsalfatt) hettin jeed Segment een Poor sietliche Apens, över de de Hämolymphe in dat Hart inströmen deit (Inströöm-Ostien). Dat Hart tekent sik dör dwerstriepte Muskelfasern ut, de en peristaltische Bülg as’n tohopentreken mööglich maakt un so de Fletigkeit vun achtern na vörn pumpt.

Dat dorsale Diaphragma scheedt den Perikardialsinus vun’n Periviscelarsinus. Ventral sitt de Perineuralsinus, wo ok dat Buukmark binnen sitt. Dat ventrale Diaphragma scheedt den Perineuralsinus vun’n Periviceralsinus un dör sien Tosamentrecken ströömt de Hämolymphe wedder na achtern.

Dat ventrale Diaphragma un de Perineuralsinus kamt in’t Geheel blots bi Insekten mit Buukmark vör un dor ok blots bi wenige Oorden.