Guillaume Bigourdan

Guillaume Bigourdan (* 6. April 1851 in Sistels, Frankriek; † 28. Februar 1932 in Paris) weer en franzööschen Astronom un Präsident vun de Académie des sciences in Paris.

Leben un Wark

Guillaume Bigourdan weer dat öllste vun dree Kinnder un is mit sien Öllern Pierre Bigourdan un Jeanne Carrère in eenfacke Ümstännen in en Buernhuus opwassen. Sien Schoolmeester un de Dörpspaster weern gewohr, dat he en hoge Intelligenz harr un hebbt dorför sorgt, dat he en Gymnasium besöken künn, ofschoonst sien Öllern de finanziellen middel dorför nich harrn. 1870 hett he sien Abitur maakt. In’n Verloop vun sien Studien hett he 1874 en licence (hüüt Bachelor) för Physik kregen un twee Johr later ok för Mathematik.

1877 hett sien fröheren Schoolmeester un dormolige Direkter vun de Steernwacht in Toulouse, François Félix Tisserand, em to sien Hülpsmann maakt. Twee Johren later is he Tisserand achteran gahn, de intwüschen Direkter vun de Steernwacht vun Paris worrn is. In’n Rahmen vun sien Arbeit is Bigourdan 1882 op dat Antilleneiland Martinique reist, woneem he den Venustransit beobachten wull. Dat Johr dorop reis he na Sankt Petersborg. In dat Johr 1886 hett he sien Dokter maakt.

In dat Observatorium hett he sik ünner annern mit de Utbilln vun sien eerst 15 Johr ollen Hülper Gaston Fayet (1874–1967) befaat, de lange Johren mit em tosamen arbeit hett un later as Direkter an de Steernwacht vun Nizza arbeit hett. Bigourdan is 1897 Titularastronom vun de Pariser Steernwacht worrn un weer 1920 de eerste Direkter vun dat Bureau International de l’Heure, dat kort vörher grünnt worrn is. 1926 güng he in’n Rohstand.

Bigourdan hett twintig Johren dormit tobröcht, de Positschonen vun 6380 Nevels to beschrieven un natokieken. Dorbi hett he ruchweg fiefhunnert ne’e Objekten opdeckt. De Publikatschoon vun sien Resultaten 1911 in fief Bännen hett im internatschonalen Rohm inbröcht. Bito hett he en Methood utklamüstert, üm de Monteren vun en Teleskop to justeren. De is as „Bigourdan sien Methood“ bekannt worrn.

He weer mit Sophie Mouchez, en Dochter vun Admiral Amédée Mouchez (1821–1892), Direkter vun de Steernwacht in Paris, verheiraat, mit de he negen Kinner harr. He is in’t Öller vun achtig Johren in Paris doodbleven.

Publikatschonen

1892: "Observations de 1884. Observations de Nébuleuses et d'amas stellaires", Annales de l'Observatoire de Paris.
1905: "Les éclipses de soleil: instructions sommaires sur les observations que l'on peut faire pendant ces éclipses, et particulièrement pendant l'éclipse totale du 30 août 1905", 1905, Paris, Gauthier Villars
1917: "Observations de 1907. Observations de Nébuleuses et d'amas stellaires", Annales de l'Observatoire de Paris.

Utteken

1883: Prix Lalande
1891: Prix Lalande
1895: Ridder vun de Ehrenlegion
1903: Opnahm in de "Académie des sciences" un dat Bureau des Longitudes
1919: Goldmedaille vun de Royal Astronomical Society
1919: Jules-Janssen-Pries
1924: Präsidentschop vun de "Académie des sciences" un vun’t Institut de France

De franzöösische Polarforscher Jean-Baptiste Charcot hett en Fjord na em nöömt, den dhe bi sien föffte Antarktisexpeditschoon an de Küst vun’t Grahamland opdeckt hett.