Good Lauenbrüch

Vun Wikipedia
Zur Navigation springen Zur Suche springen

Dat Good Lauenbrüch (hoochdüütsch Gut Lauenbrück) is en Eddelgood in dat Dörp Lauenbrüch. Dat liggt in de Gemeen Lauenbrüch (Samtgemeen Fintel) in’n Landkreis Rodenborg, Neddersassen.

To dat Good hett ok dat Vörwark Moorhuus höört. Bet 1825 harrn de Goodsherrn de Gerichtsborkeit in dat Gericht Lauenbrüch.

Geografie[ännern | Bornkood ännern]

Dat Good liggt in Lauenbrüch an dat Noordöver von de Wümm güntsied de Steed, an de de Fintau in de Wümm münnt.

Historie[ännern | Bornkood ännern]

As Daniel vun Wichtrich 1342 Bischop von dat Bisdom Veern warrn schull, keem dat to en Stried mit dat Veerner Doomkapittel. In dissen Stried sünd ok Truppen ut dat Hartogdom Bruunswiek-Lümborg in dat Stift Veern infullen. Willem II., de Hartog von Bruunswiek-Lümborg, hett denn twüschen 1344 un 1352 an de Steed, an de Wümm un Fintau tohoopfleten doot, en Waterborg boon laten, de Leuwenbrughe heten hett. De Naam kummt von’n Bruunswieker Lööw as Wapendeert von dat Hartogdom.

Mit en Oorkunn von’n 15. Juli 1493 hett Hartog Hinnerk den Vaagd von Celle, Cord von Bothmer ut de Drakenbörger Lien von de Familie von Bothmer, de Borg as Lehn geven.[1]

De Waterborg is 1775 afbrennt.

Dat hüdige Herrnhuus hett twüschen 1858 un 1860 Theodor von Bothmer boon laten.

To dat Good höört vondaag 600 Hektar Holt un bi 100 Hektar Land, op dat Bueree dreven warrt. Tosätzlich höört to dat Good noch maal 100 Hektar, de ut Moor un anner Land bestaht, wat nich bewirtschaft warrn kann.[1]

Goodsherrn[ännern | Bornkood ännern]

  • Cord von Bothmer
  • –üm 1549: Hinrik von Bothmer
  • –1596: Cord von Bothmer
  • 1596–1627: Ulrich von Bothmer
  • 1627–1628: Rudolph von Bothmer
  • –1703: Julius August von Bothmer
  • 1703–1732: Hans Caspar von Bothmer
  • 1732–1749: Carl Ludwig von Bothmer
  • 1749–1809: Hartwig von Bothmer


  • –1848: Christian Ludwig von Bothmer
  • –1869: Theodor von Bothmer
  • 1869–1918: Hans Ludwig Adolf von Bothmer
  • ~1924: Arthur von Bothmer
  • –1955: Wilhelm von Bothmer
  • Hans-Cord von Bothmer

Verwaltungsgeschicht[ännern | Bornkood ännern]

Dat Good hett vör’n 1. August 1825 to dat Gericht Lauenbrüch höört un is denn Deel von de Vaagdie Töst in dat Amt Horborg worrn. 1852 is de Vaagdie Töst in dat Amt Mesborg wesselt, dat 1859 denn in dat Amt Töst ümwannelt worrn is. Na 1885 weer dat in’n Kreis Horborg.

1858 is de Goodsbezirk Lauenbrüch grünnt worrn. 1928 is de Goodsbezirk wedder oplööst un Deel von de Gemeen Lauenbrüch worrn.

To’n 1. Oktober 1932 is de Gemeen Lauenbrüch in’n Kreis Rodenborg wesselt un 1977 Deel von’n ne’en, grötteren Landkreis Rodenborg worrn.

Inwahnertall[ännern | Bornkood ännern]

Johr Inwahners
1848-00-001848[2] 148 Lüüd. 11 Hüüs
1871-12-011. Dezember 1871[3] 78 Lüüd. 10 Hüüs

Religion[ännern | Bornkood ännern]

Dat Good Lauenbrüch is evangeelsch-luthersch präägt. Dat Rebeed höört siet 1957 to dat Kaspel von de Martin-Luther-Kark in Lauenbrüch. Vörher hett dat Good aver jümmer to dat Kaspel von de Lucas-Kark in Scheeßl höört.

För de Kathoolschen in dat Rebeed is de Hillig-Hart-Kark in Töst tostännig, de siet 1. November 2014 to de Karkengemeen St. Petrus in Bookholt tohöört.

Footnoten[ännern | Bornkood ännern]

  1. a b Werner Strelow: Spuren bis zum britischen Hof, Hamburger Abendblatt an’n 5. Oktober 1999
  2. Friedrich W. Harseim, C. Schlüter: Statistisches Handbuch für das Königreich Hannover. 1848, Sied 93: http://books.google.de/books?id=eOI-AAAAcAAJ&pg=PA93
  3. Die Gemeinden und Gutsbezirke des Preussischen Staates und ihre Bevölkerung. Berlin 1873, Sied 133: https://books.google.de/books?id=qTZDAQAAMAAJ&pg=RA2-PA133


Koordinaten:53° 12′ N, 9° 33′ O