Georg von Dannenberg

Georg von Dannenberg (* 16. November 1858 in Ollenstadt; † 29. April 1931 in Hannover) weer en düütschen Jurist un Politiker.

Von Dannenberg is 1858 as Söhn von Fredrike Karoline, borene von Arentsschildt (2. August 1831–22. September 1895; Dochter von Arnold Daniel von Arentsschildt), un den Amtsrichter Otto von Dannenberg (1812–15. Februar 1896) in Ollenstadt boren un weer op dat Lyceum I in Hannover un dat Gymnasium Celle. He hett Juristeree an de Universitäten Genf, Leipzig un Göttingen studeert. In Leipzig is he 1879 Maat von dat Corps Misnia Leipzig worrn. Na dat Studium is he in’n prüüßschen Justizdeenst gahn un 1881 Referendar worrn. He weer von 1887 bet 1905 Avkaat in Hannover un von 1888 bet 1891 Redaktör von de Deutsche Volkszeitung in Hannover, en Bladd von de Düütsch-Hannöversche Partei. As Redaktör is he mehrmaals veroordeelt worrn. To dree Maand Fängnis von wegen Beleidigung von’n Oberpräsident Rudolf von Bennigsen un to söss Maand Fängnis von wegen en Angreep op de Annekschoon von dat Königriek Hannover dör Prüßen (Verächtlichmaken von Staatsinrichtungen, § 136 StGB). De Prozess weer beide Maal vör dat Landgericht Hannover.

Nadem Theodor Held ut’n Rieksdag rut is, hett dat 1909 in’n Wahlkreis Hannover 6 (Syke, Veern) en Nawahl geven, de von Dannenberg wunnen hett. He weer von März 1909 bet 1912 för de Düütsch-Hannöversche Partei Maat von’n Rieksdag. Maat von’n Prüüßschen Landdag weer he von 1919 bet 1924. Von 1919 af an weer he ok Maat von’n Provinziallanddag Hannover.