Georg Beckmann

Georg Beckmann (* 29. Dezember 1868 in Bentwisch; † 7. Januar 1939 in Gießen) weer en düütschen Politiker von de SPD un USPD.

Beckmann is 1868 in Bentwisch boren un denn in Swartenmoor na Volksschool gahn. Na de School hett he 1883 bet 1887 in Hamborg en Lehr as Discher maakt. As he mit de Lehr trech weer, is he dör Middel- un Westdüütschland reist un hett bet 1897 as Gesell arbeidt. Denn is he as Anstellten bi de Allgemene Oortskrankenkass in Gießen anfungen un dor bet 1920 bleven.

An’t Enn von de Johren 1880 güng Beckmann in de SPD. In de Tied von’n Eersten Weltkrieg is he in dat Lager von de USPD wesselt, för de he von Juni 1920 bet Mai 1924 in’n Wahlkreis Hessen 22 (Hessen-Darmstadt) Afornten von’n eersten Rieksdag von de Weimarer Republik weer.

Beckmann weer ok siet 1908 as Arbeidgeververtreder Maat von dat Gewarvgericht in Gießen, Stadtverornten von de Stadt Gießen un Maat von’n Kreisdag un Kreisutschuss von’n Kreis Gießen.