Geoffrey Gurrumul Yunupingu

Vun Wikipedia
Zur Navigation springen Zur Suche springen
Gurrumul bi en Optridd 2011

Geoffrey Gurrumul Yunupingu (* 22. Januar 1971 in Galiwin'ku, Elcho Island, Northern Territory; † 25. Juli 2017 in Tiwi, Darwin) weer en austraalschen Musiker un Songwriter ut dat Aborigines-Volk von de Yolngu.

Leven[ännern | Bornkood ännern]

Yunupingu is 1971 as Söhn von Ganyinurra (Daisy) and Nyambi (Terry) Yunupingu in Galiwin'ku op Elcho Island vör de Küst von Arnhemland in’n Noorden von Australien boren.[1] De Familie höört to’n Gumatj-Klan von de Yolngu. Gurrumul weer sien traditionellen Naam bi sien Volk, ünner den he ok as Musiker optreden is.[2] Yunupingu weer al von Geboort an blind. He weer nich op de School un hett ok nich veel Engelsch snackt. He hett sik sülvs bibröcht Didgeridoo, Keyboard, Slagtüüg un Gitarr to spelen.[1] Von 1992 af an weer he Slagtüügspeler bi de Band Yothu Yindi, de sien Broder Mandawuy Yunupingu 1986 grünnt harr.[2] Later weer he ok Maat von de Saltwater Band.

Yunupingu hett siene Leder bet op en poor Utnahmen in siene Moderspraak Yolngu schreven un sungen. Dorbi hett he sik mit de Geschicht un de Traditschonen von sien Volk uteneensett un versöcht jem weddertogeven.[1] Sien Markenteken weer siene helle Stimm, de in de Medien faken as Engelsstimm beschreven worrn is.[1] Sien eerst Soloalbum Gurrumul weer 2008 op Platz 3 von de austraalschen Album-Charts, is 47 Weken in de Top 100 bleven un is mit 70.000 verköfft Stück in Australien mit’n Platin-Status uttekent worrn.[1][3] In de Swiez hett dat Album Gold-Status kregen.[4] In dat sülve Johr hett dat Album den austraalschen ARIA Award för dat beste Independent-Album un dat beste Weltmusik-Album kregen.[5] In’n März 2011 hett Yunupingu mit de austraalsche Roots-Band Blue King Brown de Single Gathu Mawula [Revisited] rutbröcht, wat en Neeopnahm op Engelsch von en Song weer, den he vörher al op sien Soloalbum in siene Moderspraak rutbröcht harr.

Gurrumul is in en Öller von 46 Johr doodbleven, nadem he en Hartinfarkt kregen hett as he in dat Royal Darwin Hospital weer, üm sien Hepatitis B to behanneln, de he al siet sien Kinnertied harr.[6] Ok mit de Neern harr he dat.

Diskografie[ännern | Bornkood ännern]

Alben:

  • Gurrumul (Studioalbum, 2008)
  • Rrakala (Studioalbum, 2011)
  • His Life and Music (Gurrumul & the Sydney Symphony Orchestra, Livealbum, 2013)
  • The Gospel Album (2015)

Weblenken[ännern | Bornkood ännern]

Commons-logo.svg Geoffrey Gurrumul Yunupingu. Mehr Biller, Videos oder Audiodateien to’t Thema gifft dat bi Wikimedia Commons.

Footnoten[ännern | Bornkood ännern]

  1. a b c d e Thomas Müller: Gurrumul berührt die Herzen. Op SWR3.de/Musik (12. Juni 2009)
  2. a b gurrumul.com (afropen an’n 28. Juli 2009)
  3. australian-charts.com (afropen an’n 28. Juli 2009)
  4. Auszeichnungen für Musikverkäufe: CH
  5. www.news.com.au (18. Oktober 2008)
  6. DLF24: Aborigine-Musik - Geoffrey Gurrumul Yunupingu ist tot von’n 26. Juli 2017 (afropen an’n 28. Juli 2017)