Fro vun Peiting

De Fro vun Peiting (Rosalinde dööpt) is ene Moorliek ut dat fröhe Midelöller, de an’n 23. Juli 1957 in’t Schwarzlaichmoor in Peiting in Oberbayern opfunnen worrn is.

De Fund warrt op ene Tiet üm dat Johr 1000 taxeert. De Liek leeg in ene Holtkist. De Minschen hebbt de Fro dormals in de Kist, mit fastbunnene Steen doran, in enen Diek in’t Moor smeten. Wohrschienlich sünd de Repen, mit de de Steen fastmaakt weren, mit de Tiet dörrott un de Kist is opswommen. Dat glöövt de Forschers, denn Delen vun’n Kopp un vun de Arms, de vör’e Bost överenannerleggt weren, weren temlich hin. Se legen woll, as de Kist opswommen weer, över Water, de Rest ünner Water. De Liek is ans in goden Tostand. Se harr en Ümhang ut Wull an, de bet to de Knee reck, en Hoorband un hoge Stevel ut Ledder. Disse Riederstevel weren nich ut de Gegend un sünd ans vun dor ok nich bekannt. Se stammt woll ut Oosteuropa. De Fro harr kort vör ehren Dood noch en Kind kregen.

Wat de Grund för ehren Dood weer, is nich rut. Ehr Sarg weer gau tohooptimmert. För Christen weer dat op jeden Fall nich begäng, dat Lieken in’t Moor kemen.

De Moorliek liggt hüüt in’t Textilmuseum in Neemünster. Dat Törfmuseum in Rottau hett ene Kopie.