Fritz Ligges

Fritz Ligges (* 29. Juli 1938 in Asseln; † 21. Mai 1996 in Herbern) weer en düütsch Völsiedigkeits- un Springrieder un Bundstrainer vun de Jöögd. Besünners spoodriek weer he in de 1960er bit 1980er Johren, as he ünner annern bi Olympisch Spelen Medaillen wunn.

Leven

Boren wurr Ligges as Söhn vun en Buernfamilie. Sien Vader hett Koltblüter as Arbeitsdeerten för den Verkoop tücht un hull en paar Ponys. Up eben Ponys hett Ligges dat Rieden all in jung Johren lernt un ok den Umgang mit Peer allgemeen. He hett de Realschool in Düörpm besöcht un dornah en Landwertschapsschool. Later sull he den Hoff vun sien Vader övernehmen. Sien tweejohrig praktisch Utbillen up en landwertschaplichen Bedriev hett he denn aber afbraken, um sück vull un ganz up dat Rieden to konzentreeren.

1968 hett he sien Ehefru Ulrike (boren Lauterjung) heiraadt, mit de he twee Söhns harr.

Sportlich Loopbahn

1959 hett he dor Spood up ländlich Turnieren up sück upmarksom makt un wurr vun den DOKR to Lehrgängen nah Warnduorp inladen, wo he ünner annern vun Hans Günter Winkler ünnerricht wurr. To disse Tiet leeg Ligges sien Hööftoogenmark noch up dat Völsiedigkeitsrieden. 1960 harr he sück all för de Olympisch Spelen qualifizeert wurr aber denn doch nich nommen, wiel man mehr erfohren Rieders nommen hett. 1961 un 1962 wunn he mit Föhn jeweils de Düütsch Meesterschap vun de Völsiedigkeitsrieder, dormals noch Military nömmt.

Um sück optimal up de Olympisch Spelen 1964 vörbereiten to können, is he 1962 mit sien Peer för twee Johr nah Warendorf trucken. De Qualifikatschoon un de Nomineeren klapp denn ok, ok wenn sien best Peerd Föhn verletzt weer un nich starten kunn. Up sien tweet Peerd Donkosak wunn he bi de Olympisch Spelen aber jeweils de Bronzemedaille in de Eenzel- un Mannschapswertung. Af denn hett he sück ok blots noch up de Springriederee konzentreert.

Af 1967 wurr Ligges ok mehr un mehr Trainer, wobi he vun sien Riederkollegen den Ökelnaam "Daamentrainer" verpasst kreeg, wiel he överwiegend Amazonen ünnerrichten dee.

För de Olympisch Spelen 1972 in München kunn Ligges sück weer qualifizeeren He un sien Peerd Robin gullen in't Vörfeld as dat swachste Paar vun dat düütsch Quartett mit Gerd Wiltfang, Hartwig Steenken un Hans Günter Winkler, weern aber nahderhen dat best düütsch Paar in den Mannschapskamp. De veer Rieders wunnen denn ok de Goldmedaille.

Kört nah de Spelen hett sück sien Peerd Robin aber en Been braken un muss toletzt inslaapen wurrn. Dat weer denn mit en Grund dorför, dat sück Ligges noch mehr up de Utbillen vun jung Rieders un Peer konzentreeren dee. So wurr bispeelswies ok dat dormale Swiezer Talent Markus Fuchs bi Ligges traineert.

Parallel to sien Karriere fung Ligges ok mit de Tucht an un hett sien eegen Gestüt upbaut, de sien eerst Uthangensschild bit to sien Verkoop 1979 an Leon Melchior nah Zangersheide de Hingst Ramiro weer. Ebenfalls in dat Johr 1979 hett Ligges den Hoff vun sien Öllern verköfft un hett bi Mönster en nee Anwesen baut, wo dat Gestüt Ligges noch hüüd is.

För de Olympisch Spelen 1984 in Los Angeles hett he sück ok noch mal qualifizeert un wunn up Ramzes Mannschaps-Bronze.

1986 truck Ligges ut den aktiven Sport torüch un övernehm dat Amt vun den Bundstrainer vun de Junioren un Jung Rieders, mit de he bit 1996 all tosommen 34 Medaillen up internatschonalen Championaten winnen kunn 1990 wurr hüm vun de FN de Titel Riedmeester verleeht. Buterdem hett he sück stark bi den Westfäälschen Peerstammbook insett, to de sien Vörstand he teihn Johr lang hörr un wo he Liddmaat vun de Körkommission un vun dat Auktschoonsteam weer.

An' 21. Mai 1996 is Ligges an en Hartinfarkt in sien Heimatoort Herbern storven. In Erinnerung an hüm wurr 2010 in den Düörpmer Stadtdeel Asseln en nee baut Straat as Fritz-Ligges-Straße nömmt.

Wat he schafft hett

• Olympisch Spelen:
  • 1964 in Tokio: Bronzemedaille Mannschap, Bronzemedaille Eenzel up Donkosak in de Military
  • 1972 in München: Goldmedaille Mannschap, Eenzelwertung 8. up Robin in't Springrieden
  • 1984 in Los Angeles: Bronzemedaille Mannschap up Ramzes in't Springrieden
• wiederee:
  • 2x Düütsch Meester in't Military (1961 un 1962 jeweils up Föhn)
  • Sieger in' Großen Preis von Deutschland (1966 up Finette)

Literatur

• Eckhard F. Schröter: Das Glück dieser Erde …: Leben und Karriere deutscher Springreiter. Fischer, Frankfurt am Main 1980, ISBN 3-596-23019-5.

Weblenken

• Websteed vun dat Gestüt Ligges
• Fritz Ligges in de Datenbank vun Sportsreference.com (engelsch)