Franz Josef Wagner (Journalist)
Franz Josef Wagner (* 7. August 1943 in Olmütz) is en düütschen Boulevard-Journalist.
Wagner is 1943 in Olmütz boren un in Regensburg opwussen. He weer dor ünner annern ok Sänger in’n Domspatzen-Chor. He güng op en Kloosterschool, hett aver de Abiturprüfung nich bestahn un is ahn Afsluss afgahn.[1] En poor Johr hett he sik denn mit lüttje Jobs dörmogelt.
Wagner is verheiraadt un hett ene Dochter. He leevt in Berlin.
As Journalist[ännern | Bornkood ännern]
Wagner hett as Journalist mit en Volontariat bi de Nürnberger Zeitung anfungen.[2] Vun 1966 af an weer he bi’n Axel-Springer-Verlag, ünner annern as Kriegsberichterstatter un Chefreporter för de Bild-Zeitung. In de Johren 1970 hett he ok blangenbi as Ghostwriter för Franz Beckenbauer un Udo Jürgens arbeidt.
1988 güng Wagner to’n Burda-Verlag na München un weer Chefredaktör bi de Boulevard-Tietschrift Bunte. Bi Burda hett he ok tohoop mit Günter Prinz de Tietschriften Elle un Super-Illu utklamüsert. 1991 keem dat Boulevardblatt Super!, bi dat Wagner nu Chefredaktör weer. Se schull in’n de Ne’en Bundslänner de Bild-Zeitung Konkurrenz maken. Na een Johr weer dat aver al wedder ut mit dat Blatt. Opsehn möök Wagner dor al an’n tweten Dag mit de Överschrift „Angeber-Wessi mit Bierflasche erschlagen – Ganz Bernau ist froh, daß er tot ist“ (3. Mai 1991), de glieks de Lien vun Super! wiesen dee.
1998 keem Wagner trüch na’n Springer-Verlag un weer denn Chefredaktör vun de B.Z. un B.Z. am Sonntag. 2000 müss he as Chefredaktör aftreden, nadem he Franziska van Almsick to de Tiet vun de Olympschen Spelen ganz un gor dalschreven harr un ehr ünner annern Franzi van Speck un Molch nöömt harr. De Lüüd bi de B.Z. wullen em sounso loswarrn, vun wegen sien Stil in’n Journalismus, den de Redaktörs as chaootsch un verlagen ansehn, so dat welk vun de Redaktörs vun de B.Z. sogor anonym en Websteed opstellt harrn, de sik gegen Wagner richten dee.[3]
Den 3. Januar 2001 is Wagner „Chefkolumnist“ bi Springer worrn, extra för em hebbt se dissen Posten nee opstellt. He schrifft de Kolumnen „Post von Wagner“ Maandags bet Sünnavends in de Bild-Zeitung un bet 2005 „Wagners Welt“ jede Week in de Welt am Sonntag. För de Kolumne „Post von Wagner“ hett he 2002 den Journalisten-Pries Gollene Fedder vun’n Bauer-Verlag in de Kategorie „Print“ kregen.
Wagner hett ok Böker schreven. Ünner annern de Romaans Das Ding (ok as Film), Big Story, Wolfsspur, Im September, wenn ich noch lebe un Boris. Besünners Das Ding hett sik good verköfft.
In siene Kolumnen wiest sik Wagner temlich radikal. He versöcht sik in de Rull vun’n prototyypschen „Klenen Mann“, de jüst as an’n Stammdisch allens seggt, wat he meent un kene Rücksicht op nix nimmt, ok wenn villicht de Wohrheit nich jümmer de ganze is.
Footnoten[ännern | Bornkood ännern]
- ↑ Post von Wagner: Liebe Lehrer, liebe Eltern, Bild, 5. Januar 2008
- ↑ Alexander Kühn: Franz-Josef Wagner - Der Großstadtindianer, alpha-journalisten.de, Uttog ut Stephan Weichert, Christian Zabel (Rutgevers): „Die Alpha-Journalisten“, Herbert von Halem Verlag, 2007
- ↑ World Wide Wagner, Website über Franz-Josef Wagner als B.Z.-Chefredakteur, von Redakteuren der B.Z. ohne Namensnennung betrieben
Weblenken[ännern | Bornkood ännern]
- Bildblog över Artikels vun Wagner (hoochdüütsch)