Football-Weltmeesterschop 2002

Vun Wikipedia
Wesseln na: Navigatschoon, Söök

De Endrunn vun de 17. Football-Weltmeesterschop is vun'n 31. Mai bit to'n 30. Juni 2002 in Japan un Süüdkorea utspeelt wurrn. To'n lesten Mol dröff de vörmolige Weltmeester dor mitmaken, ohne sik in en Qualifikatschoon eerst mol gegen annere Mannschoppen dör to setten. Wunnen hett de brasiliaansche Mannschop, de dor to'n föfften Mol mit Weltmeester wurrn is. Tweeten is de düütsche Mannschop wurrn.

Gastgevers[ännern | Bornkood ännern]

To'n eersten Mol in de Geschicht vun de Football-Weltmeesterschoppen is en Turnier in Asien utspeelt wurrn, un to'n eersten Mol hett dat glieks twee Länner geven, de Gastgevers ween sünd: Japan un Süüdkorea. Beide wullen an un for sik dat Turnier woll utrichten, man nich tosamen. Man denn hett de FIFA Japan un Süüdkorea tohopen den Toslag geven, wat en beten överrascht hett.

Süüdkorea un Japan sünd, vunwegen de Tied, as Korea en Provinz vun Japan weer (1910 bit 1945) keene goden Frünnen. Vundeswegen hett dat al duchtig Theater geven, as de ganze Sake plaant wurrn weer. Sunnerlich geev dat dor Striet um, wecken Naam toeerst nömmt weern scholl un wo dat Endspeel utspeelt weern scholl. Amenne sünd se övereen kamen, de Weltmeesterschop scholl mit en grode Fier in Seoul losgahn un dat Endspeel, dat scholl in Yokohama ween. Böverdem scholl de koreaansche Naam vörn stahn. So is de offizielle Naam vun de WM ween: 2002 FIFA World Cup Korea/Japan.