De fofftig Penns

De fofftig Penns war ’n plattdüütsche Musikgrupp, de Hip-Hop- un Elektro-Musik maken deit. De dree Jungs ut Bremen-Noord, Malte Battefeld (Riemelmeester Malde) ut Vegesack, Jakob Köhler (Kommodige Jaykopp) ut Grambke un Torben Otten (Plietsche Torbän) ut Aumund, wahnt middewiel in Berlin un Hamborg.^[1] Se sünd wull de eersten, de elektroonsch Musik, Hip-Hop un Plattdüütsch, de Spraak, de se vun jemehr Grootöllern lehrt hebbt, mitenanner vermengeleren deen.^[2]

Geschicht

Noch in de Schooltiet in’t Johr 2003 ut Jux dat eerste Mol tohoopkamen, treedt De fofftig (Bremer Platt för föfftig or fieftig) Penns twaars eerst siet 2009 live up, aver dat regelmatig un vör allen in Noordüütschland. Jemehr Naam kümmt vun den amerikaanschen Rapper 50Cent, wieldat den sien Leed „P.I.M.P” Vörbild weer för dat eerste Leed vun De fofftig Penns.

För jemehr Leder bruukt de Grupp faken Instrumentals vun bekannte Muuskanten, so as Nachlader, Egotronic or Supershirt.^[3] De Lüüd, de de originole Musik maakt hebbt, köönt mit düsse plattdüütsche Versionen tomehrst bannig good leven.^[4]

Blangen jümmers mol wedder ‘n Uptritt hier un dor in’t Vörprogramm vun Bands as Testsieger, Egotronic or Schluck den Druck, gung dat in’t Fröhjohr 2010 dat eerste Mol up Tournee. In’n Septembermaand harrn De fofftig Penns Uptritten in ‘n Reeg Scholen in Neddersassen.^[5] Butendem weren se in’n Oktobermaand 2009 as plattdüütsche Deelnehmers bi dat Liet International mit vun de Partie. Dat is in Musikwettstriet för de Regional- un Minnerheidenspraken vun Europa, de dormaals in de freesche Stadt Liwwadden stattfinnen dee.^[6]

In’n Novembermaand 2010 keem „Platt“, de eerste offitschelle Single vun de Band, as Online-Release rut up dat Label „BoingBoingRecords“ vun den Berliner Muuskant Nachlader.

2013 hefft de Fofftig Penns for Bremen an den Bundesvision Song Contest in Mannheim deelnahmen un sünd dor mit ehren Song Löppt bi up'n 7. Platz kamen. Dor hefft se vun all Bundslänner Punkte bi kregen.

Een Dag later is Dialektro rutkamen. Dat weer de Band ehr eerstet Album. In'n Harfst 2014 is de EP (Mini-Album) Een Vun De Fofftig Penns rutbrocht wurrn. Harfst 2016 keem denn en plattdüütsche Verschoon vun Klaus un Klaus ehrn olen Hit An der Nordseeküste rut. De Original-Interpretens hefft dor den Text vun den Refreng bi tostüert.

In'n April 2018 hett de Band bekannt geven, datt se sik to'n Enne vun dat Johr uplösen will.^[7]

Press

Sietdem dat De fofftig Penns ok as Live-Band geven deit, intresseert sik verscheden Medien dor so männichmol vör, wat de Grupp an’t doon is. Dat geev Bidrääg in lokale un överregionole Blöer^[8] un ok lütte Uptritten in Radio-^[9] un Fernsehsennen.^[10]

Priese un Utteknungen

An'n 25. Februar 2012 sünd se uttekent wurrn mit den Heinrich-Schmidt-Barrien-Pries^[11].

Diskografie

26. November 2010: Platt - Single (BoingBoingRecords)
9. November 2012: Löppt - Single (Random Mode Records)
27. September 2013: Dialektro - Album (Welcome Home Music)
12. Dezember 2014: Een Vun De Fofftig Penns (Welcome Home Music)
4. Dezember 2015: Dascha 'n Ding - Single (Welcome Home Music)
11. November 2016: An de Noordseeküste (mit Klaus und Klaus) - Single (Welcome Home Music)
24. November 2017: Duuster (mit Flo Mega) - Single (Welcome Home Music)
7. Dezember 2018: Dat läppert sik – Dat Beste vun De fofftig Penns - Album (Welcome Home Music)

Weblenken

De fofftig Penns. Mehr Biller, Videos oder Audiodateien to’t Thema gifft dat bi Wikimedia Commons.

Websteed vun de Grupp (platt- un hoochdüütsch)
De fofftig Penns bi MySpace

Quellen

[1] Artikel up Spiegel-Online

[2] Bidrag vun Guten Abend RTL

[3] Interview up bremen4u

[4] Supershirt över De fofftig Penns

[5] Pressemitdelen Landesschoolamt Neddersassen

[6] Uptritt up dat Liet International

[7] Zappenduuster bei De Fofftig Penns: Band-Auflösung nach 15 Jahren Bremen-Norder Platt-Rap

[8] Artikel in de taz

[9] Live up Radio Bremen 4

[10] NDR Mein Nachmittag

[11] Plattnet

[1]

[2]

[3]

[4]

[5]

[6]

[7]

[8]

[9]

[10]

[11]