Fleetwood Mac

Fleetwood Mac is en britisch-amerikaansch Musikgrupp.

Bandhistorie

1967 hebbt de Gitarrist Peter Green, de Slagtüüchspeler Mick Fleetwood – beid ehmalge Liddmaaten vun John Mayall sien Bluesbreakers – un de Bass-Gitarrist Bob Brunning de Band Peter Green's Fleetwood Mac. Nah en Live-Inspelen (Live at The Marquee 1967, Peter Green, Mick Fleetwood, Bob Brunning un Jeremy Spencer) un de Studio-Inspelen Long Grey Mare (Peter Green, Mick Fleetwood, Bob Brunning) hett Bob Brunning noch in dat sülvig Johr de Band verlaaten un wurr dör John McVie ersett, de noch as Bass-Gitarrist mit Mick Taylor (later Gitarrist bi The Rolling Stones) as Liddmaat vun de Bluesbreakers bi John Mayall speel. Kört Tiet later wurr ok Jeremy Spencer (Gitarr, Gesang, Klaveer) fast Liddmaat vun de Band Peter Green's Fleetwood Mac.

Fleetwood Mac weer to Anfang en bannig spoodriek Bluesband. Fröh Hits weern Oh, Well, dat Instrumental Albatross un Black Magic Woman (dat allerdings eerst dör de Adaptschoon vun Santana to’n Welthit wurr). 1969 hett Fleetwood Mac mit Peter Green mehr Schallplatten as de Beatles un de Rolling Stones verköfft. Mit den dormals eerst 18-Johrigen Danny Kirwan keem Gitarrist Nummer dree in de Band. Peter Green söch Entlastung, wiel de Spood vun de Band alleen up sien Schuller lasten dee un Jeremy Spencer hüm kompositorisch nich ünnerstütten kunn. De Överdruss an de Funktschoonswies in den modernen Musik-Business un de Medien hebbt Peter Green dorto brocht, sien Doon un sien nich minn Innahmen in Fraag to stellen. Dorto keem exzessiv Gebruuk vun LSD, wat nahhaltig Effekte up sien Psyche harr – bit to diagnostizeert Schizophrenie. Sien Vörslagg, de Tantiemen karitativ intosetten, wurr vun de anner Bandliddmaaten aflehnt. Peter Green hett doruphen de Band verlaaten.

Nah den Weggang vun Peter Green 1970 änner sück de Musikstil vun de Band allmählich vun‘ Blues hen to’n Mainstream-Rock- un Popmusik.

De Band hett etliche Personalwessel dörleevt. Jeremy Spencer bleev bit 1971 un wurr Liddmaat vun de Sekte Children of God. Danny Kirwan wurr 1972 wegen sien Alkoholsucht un anner psychisch Probleme entlaaten un is later in de Obdaaklosigkeit afrutscht. Bekannt Liddmaaten weer de fröhere Chicken Shack-Singerin Christine McVie, boren as Christine Perfect, de John McVie noch to Macs Blues-Tieden in England heiraadt harr, as ok de Gitarristen Bob Welch (siet 1971), Bob Weston un Rick Vito. Anner Musikers de in de Band mitspeelt hemm sünd Dave Walker (1972–1973), Billy Burnette (1988–1996), Dave Mason, all Gitarr un Gesang, un Bekka Bramlett (Gesang).

1974 hett Bob Welch de Band weer verlaaten, un as Gitarrist wurr Lindsey Buckingham anhüert. De hett sien Früendin Stevie Nicks as Singerin un Komponistin mitbrocht. Dat Paar harr tovör ünner de Naam Buckingham Nicks all en gemeensam Album rutbrocht.

1975 keem dat Album Fleetwood Mac herut, dat sück bannig good verköfft hett. En noch grötteren Spood harr aber 1977 Rumours, dat mit alleen in de USA mehr as 19 Million verköfft Platten en vun de spoodriekst Alben in de Musikhistorie is. Rumours gellt ünner Fans as dat „Krisen-Album" der Band, wiel dat bi dat Entstahn ünner annern to’n Bröök tüschen John McVie un sien Fru Christine McVie up de een Siet keem, un Stevie Nicks ehr dormaligen Früend Lindsey Buckingham den Looppaas geev – en Gerücht nah togunsten vun Mick Fleetwood, as de ok in verscheeden Interviews bestätigt hett (ünner annern up de DVD The Mick Fleetwood Story). 1979 keem as lang ersehnt Nahfolger dat in’t Heimstudio upnommen Album Tusk herut, up dat de Band mit reduzeerten Arrangements countrylastige Balladen un deftige Rock'n'Roll-Songs verapenlichen dee. Tusk is bit hüüd bi Kritiker bannig schätzt. De amerikaansch Indierock-Band Camper Van Beethoven hett sogor dat ganze Album covert. Bi dat Publikum full Tusk aber ehder dör.

Later fungen Buckingham, Nicks un Christine McVie Solo-Karrieren an. 1987 hett Buckingham de Band wiels de Tour to dat Album Tango in the night verlaaten. Billy Burnette un Rick Vito keemen as Gitarristen dorto.

In de 1990er Johren geev dat eenig Weddervereenigungen vun de Besetten Buckingham/Nicks/McVie(s)/Fleetwood, de to’n Bispeel den Song Don't Stop inspeel, de vun Bill Clinton to de Hymne vun sien Wahlkamp maakt wurr. De letzte funn 1997 statt; dat hannel sück um en Reunion-Konzert in Burbank, Kalifornien, dat vun de Warner Music Group as Modersellschopp vun dat aktuell Label vun de Band organiseert wurr. Dat is bither (Stand April 2007) dat letzte offiziell Konzert vun de Band tosommen mit Christine McVie.

1998 wurr de Band in de Rock and Roll Hall of Fame^[1] upnommen.

2002 hebbt sück John McVie, Fleetwood, Buckingham un Nicks weer gemeensam in’t Studio drapen un hebbt dat in‘ April 2003 rutbrocht Album Say you will upnommen. Dornah folg en Tournee dör Europa un de USA. De Song Peacekeeper, de eerste Single-Utkopplung, geev dat dorbi in twee verscheeden Versionen: Up dat Album, bi Konzerten un up de europäisch Singles heet en Textzeile ... take no prisoners, only kill, wiels dat up de US-Single in ... take no prisoners, break their will ännert wurr.

Siet 2009 tourt de Band in de Besetten Mick Fleetwood, John McVie, Stevie Nicks un Lindsey Buckingham up hör „unleashed"-Tournee weer tosommen dör de Welt. Eerste Songs vun en ankünnigt Studioalbum wurrn up de 2013er Tour speelt, dorünner Without You, dat all 1974 komponeert, aber nie herutbrocht wurrn weer. Nahdem se in'n Harvst 2013 all tweemal bi Fleetwood-Mac-Upträen as Gast dorbi ween weer, wurr Anfang 2014 bekannt geven, dat Christine McVie weer in de Band mit bi weer.^[2] In de klassisch Besetten mit Mick Fleetwood, John McVie, Christine McVie, Lindsey Buckingham un Stevie Nicks fung de Band an'n 30. September 2014 en Nordamerika-Tournee an. An'n 14. Juni 2015 is de Band as Headliner bi dat Isle of Wight Festival uptreeden.^[3]^[4] In'n April 2018 wurr bekannt, dat Gitarrist Lindsey Buckingham de Gruppe wegen Striedereen över en plaant Tournee verlaaten harr. An sien Stäe sünd Mike Campbell un Neil Finn in de Band intreeden.^[5]

2012 hett sück dat ehmalge Bandliddmaat Bob Welch ümbrocht, Bob Weston is in dat glieker Johr storven un Danny Kirwan in 2018. Dat Grünnensliddmaat Peter Green is an'n 25. Juli 2020 storven. An'n 30. November 2022 is Christine McVie storven.

Diskografie

Alben

Jhr	Album	UK	D	USA	Besetten
1968	Peter Green’s Fleetwood Mac	4	-	198	Fleetwood, Green, J. McVie, Spencer
1968	Mr. Wonderful	10	-	-	Fleetwood, Green, J. McVie, Spencer
1969	English Rose	-	-	184	Fleetwood, Green, Kirwan, J. McVie, Spencer
1969	The Pious Bird Of Good Omen	18	-	-	Fleetwood, Green, Kirwan, J. McVie, Spencer
1969	Then Play On	6	-	109	Fleetwood, Green, Kirwan, J. McVie, Spencer
1970	Kiln House	39	-	69	Fleetwood, Kirwan, J. McVie, Spencer
1971	Future Games	-	-	91	Fleetwood, Kirwan, J. McVie, C. McVie, Welch
1972	Bare Trees	-	-	70	Fleetwood, Kirwan, J. McVie, C. McVie, Welch
1973	Mystery To Me	-	-	67	Fleetwood, J. McVie, C. McVie, Welch, Weston
1973	Penguin	-	-	49	Fleetwood, J. McVie, C. McVie, Walker, Welch, Weston
1974	Heroes Are Hard To Find	-	-	34	Fleetwood, J. McVie, C. McVie, Welch
1975	Fleetwood Mac	23	-	1	Buckingham, Fleetwood, J. McVie, C. McVie, Nicks
1977	Rumours	1	6	1	Buckingham, Fleetwood, J. McVie, C. McVie, Nicks
1979	Tusk	1	3	4	Buckingham, Fleetwood, J. McVie, C. McVie, Nicks
1980	Live	31	51	-	Buckingham, Fleetwood, J. McVie, C. McVie, Nicks
1982	Mirage	5	12	1	Buckingham, Fleetwood, J. McVie, C. McVie, Nicks
1987	Tango in the Night	1	2	7	Buckingham, Fleetwood, J. McVie, C. McVie, Nicks
1988	Greatest Hits	3	9	14	verscheeden Besetten
1990	Behind The Mask	1	4	18	Burnette, Fleetwood, J. McVie, C. McVie, Nicks, Vito
1992	25 Years – The Chain (Compilation)	-	86	-	verscheeden Besetten
1995	Time	47	92	-	Bramlett, Burnette, Fleetwood, Mason, J. McVie, C. McVie
1997	The Dance (Live Album)	15	20	1	Buckingham, Fleetwood, J. McVie, C. McVie, Nicks
2002	The Very Best Of Fleetwood Mac	7	31	12	verscheeden Besetten
2003	Say You Will	6	10	3	Buckingham, Fleetwood, J. McVie, Nicks

2004 - De Alben Fleetwood Mac, Rumours und Tusk in de Besetten Mick Fleetwood, Stevie Nicks, Christine McVie, Lindsey Buckingham un John McVie kommt as nee upleggt un digital remasterte Düppel-CDs herut: De eerst enthollt de Titel vun dat jeweilig Album, de tweet Bonustracks, Demos un Outtakes vun de jeweilig Albumsessions. Jedet Bandliddmaat hett sück ok as Solo-Komponist verewigt.

Singles

Johr	Single	UK	D	USA
1967	I Believe My Time Ain't Long	-	-	-
1968	Black Magic Woman	37	-	-
1968	Need Your Love So Bad	31	-	-
1969	Albatross	1	19	-
1969	Man Of The World	2	23	-
1969	Rattlesnake Shake	-	-	-
1969	Oh Well	2	5	55
1970	The Green Manalishi	10	16	-
1970	Jewel Eyed Judy	-	-	-
1975	Over My Head	-	-	20
1976	Rhiannon	46	-	11
1976	Say You Love Me	40	-	11
1977	Go Your Own Way	38	11	10
1977	Dreams	24	33	1
1977	Don't Stop	32	41	3
1977	You Make Loving Fun	45	-	9
1978	Rhiannon	-	-	n. v.
1979	Tusk	6	7	8
1979	Sara	37	44	7
1980	It's Not That Funny		-	-
1980	Think About Me	20	-	-
1980	Sisters Of The Moon	-	-	86
1981	Fireflies	-	-	60
1981	Farmer's Daughter	-	-	-
1982	Hold Me	-	64	4
1982	Gypsy	46	-	12
1982	Love In Store	-	-	22
1982	Oh Diane	9	46	-
1982	Can't Go Back	83	-	-
1987	Big Love	9	17	5
1987	Seven Wonders	56	47	19
1987	Little Lies	5	3	4
1988	Everywhere	4	-	14
1988	Family Man	54	29	90
1988	Isn't It Midnight	60	-	-
1988	As Long As You Follow	66	-	43
1989	Hold Me	94	-	n.v.
1990	Save Me	53	36	33
1990	Skies The Limit	-	-	n.v.
1990	In The Back Of My Mind	58	-	-
1992	Love Shines	-	51	-
1992	Don't Stop			n. v.
1992	Paper Doll	n. v.	n. v.
1995	I Do
1997	Temporary One (live)	-	99	-
1997	Silver Springs (live)	-	-	41
1998	Landslide (live)	-	-	51
2003	Peacekeeper	-	-	80
2003	Say You Will (Single Remix)	n. v.	n. v.	Promo-CD

Videografie

Peter Green's Fleetwood Mac - The Early Years (1996) VHS
Tango in the night (1988) - All in de nee Besetten ahn Lindsey Buckingham. 2003 keem de Re-Release up DVD.
A Special Story (1990) Promo-Video mit Dokumentatschoon
Classic Albums: Rumours (1997) BBC-Dokumentatschoon
The Dance (1998) vullstännig Mitsnitt vun dat 1997er Reunion-Konzert in Burbank, CA
Live in Boston (2004) ok as Limited Edition mit Bonus-Live-CD
Destiny Rules (2004) Dokumentatschoon up DVD