Flagg vun Sudan

Vun Wikipedia
Zur Navigation springen Zur Suche springen
FIAV Flagg vun’n Sudan (Format 1:2)

De Flagg vun’n Sudan is as offizielle Flagg vun den Staat Sudan an’n 20. Mai 1970 annahmen worrn. Utklamüstert worrn is se vun Abdalrahman Ahmad Aljali, de an de Kunsthoochschool studeert harr.

Utsehn un Bedüden[ännern | Bornkood ännern]

De panaraabschen Klören in de Flagg dokumenteert de Anlehnen an de Araabsche Befre’ensflagg:

  • Gröön steiht för den Islam, de Dynastie vun de Fatimiden un för’t Gootgahn vun’n Staat.
  • Root is de Klöör vun de Revolutschoon, vun’n Sozialismus, vun’t Vörankamen un stieht för de Oppers, de de Kamp üm den Natschonalstaat köst hett.
  • Witt is en Teken för Freed, Licht un Optimismus un steiht butendem för de witte Revolutschoonsflagg vun 1924 vun de Liga vun de Witten Fahn.
  • Swart wiest opletzt op de Tohöörigkeit to’n „Swarten Eerddeel“ hen – dat araabsche Woort Sudan heet neemlich „swart“. Bito weer swart de Hööftklöör vun de Flagg vun Muhammad Ahmad, en sudaneeschen Volksföhrer ut dat 19. Johrhunnert, de sik sülvst as Mahdi utgeven hett.

De Spitzt vun’t gröne Dreeeck reckt to’n Drüddel vun de Flaggenläng in den witten Striepen rin.

Historie[ännern | Bornkood ännern]

Histoorsch Flagg Flagg vun’n Sudan 1956–1970
Sietenproportschoon 1:2

De Flagg is inföhrt worrn, nadem de Sudaneeschw Sozialistische Union ünner Dschafar Muhammad an-Numeiri 1969 de Macht in dat Land an sik bröcht hett. An’n 20. Mai 1970 weer se dat eerste mol offiziell bruukt. De vörige Flagg (Bild) is siet de Unafhangigkeit in’t Johr 1956 in Bruuk wesen.

Kiek ok[ännern | Bornkood ännern]

Literatur[ännern | Bornkood ännern]

Weblenken[ännern | Bornkood ännern]

Commons-logo.svg Flaggen vun’n Sudan. Mehr Biller, Videos oder Audiodateien to’t Thema gifft dat bi Wikimedia Commons.