Flagg vun Malawi

Vun Wikipedia
FIAV Flagg vun Malawi (Format 2:3)

De Flagg vun de Republiek Malawi is an’n 6. Juli 1964 offiziell inföhrt worrn.

Beschrieven un Bedüden[ännern | Bornkood ännern]

Tostannen kamen is de Flagg ut de swart-root-gröne Fahn vun de Malawi Congress Party, de dat Land in de Unafhangigkeit föhrt hett. De Ünnerscheed is blots, dat de Parteifahn nich de Sünn in den swarten Striepen opwiesen de. De Klören hebbt ünnerscheedliche Bedüden:

  • Swart steiht för dat Volk op den afrikaanschen Eerddeel.
  • Root steiht för’t Blood vun de Märtyrers, dat in’n Freeheitskamp vergaten worrn is.
  • Gröön wiest op de velen Woolden vun Malawi.

In den böversten (swarten) Striepen is de morgenrode Sünn afbillt, de opgeiht. Mit ehr eenundörtig Strahlen steiht se as Teken vun’t Morgenroot för de Hapen op en free un eenig Afrika. De Sünn weer al siet 1914 en Teken för de Kolonie Njassaland.

Historie[ännern | Bornkood ännern]

Dat Rebeet vun’t hüütige Malawi is 1891 en britisch Protektorat worrn. 1914 hett dat Njassaland en egen Wapen kregen un hett dat in de tyypschen britischen Kolonialflagg föhrt. De weer düsterblau mit den Union Jack in’n Kanton (bövere, linke Eck) un dat Wapen vun de Kolonie ünnen rechts.

Twüschen 1953 un 1963 weer dat Njassaland tosamen mit Süüdrhodesien (vundaag: Simbabwe) un Noordrhodesien (Sambia) en Deel vun de Föderatschoon vun Rhodesien un Njassaland. Dat ne’e Wapen wies en goldene Sünn, de opgeiht, op blauen Grund för Njassaland, den roden Löwen för Süüdrhodesien un söss sülvern Bülgen op swarten Grund för Noordrhodesien. De Förderatschoon is an’n 31. Dezember 1963 uteneenbroken, as Sambia un Malawi vun Grootbritannien unafhangig worrn sünd.

Born[ännern | Bornkood ännern]

Weblenken[ännern | Bornkood ännern]

Flagg vun Malawi. Mehr Biller, Videos oder Audiodateien to’t Thema gifft dat bi Wikimedia Commons.