Fausto Coppi

Fausto Coppi 1952

Gedenksteen för Coppi an’ Pordoijoch (Italien)

Fausto Coppi (* 15. September 1919 in Castellania; † 2. Januar 1960 in Tortona) weer en italieensch Radrennfohrer un dreefak Weltmeester. Coppi, de „il Campionissimo“ („Weltmeester vun de Weltmeester“) nömmt wurr, weer en vun de spoodrieksten un populärsten Radfohrer in de Historie. He wunn tweemal de Tour de France un fievmal den Giro d’Italia.

Radsport-Loopbahn

Sien eersten grooten Spood harr Coppi all 1940, as he mit man blots 21 Johren eerstmals de Giro d’Italia wunn. Dorbi hett he vun dat Ünnerstütten dör sien dormalig Teamkollegen Gino Bartali profiteert, de een Johr vörher den Giro wunnen harr. 1942 hett Coppi en neen Stünnweltrekord (45,871 km) upstellt, de 14 Johr lang Bestand hemm sull, bit Jacques Anquetil hüm 1956 verbetert hett. Later hett Coppi ingestahn, bi disse Rekordfohrt mit Amphetaminen dopt ween to hemm. Sien völversprekend Karriere wurr dör den Tweeten Weltkrieg ünnerbraken. Eerst 1946 kunn he weer Rennen fohren. Dat keem dornah to en Siegesserie, de eerst vun Eddy Merckx överdrapen wurrn kunn.

Tweemal, 1949 un 1952, wunn Coppi as eerst Rennfohrer dat begehrte „Double“, also nah’nanner de Gesamtwertung vun den Giro d’Italia un Tour de France in een Johr. Fiev mal wunn de „Campionissimo“ den Giro. Gemeensam mit Alfredo Binda un Eddy Merckx hollt he dormit den Rekord. Fausto Coppi dominier aber ok de swoorsten Eendagsrennen, ok wenn he in‘ Sprint nich ganz so stark weer. He wunn fievmal de Lombardei-Rundfohrt, dreemal Mailand–Sanremo un eenmal Paris–Roubaix. Dorto wurr he 1953 Straten-Weltmeester. In dat sülvig Johr wurr he vun de Verantwortlichen vun de Tour de France nich inlaaden, dor se bang weern, dat dat apenlich Interesse an de Tour bi Coppi sien Dominanz torüchgahn kunn.

Rivalität mit Bartali

De aktiv Tiet vun Fausto Coppi wurrd as Anfang vun de „golden Tiet vun den Radsports“ betekent. En wichtig Faktor för disse Inschätzung stellt de Konkurrenz vun Coppi mit den fiev Johr ölleren Gino Bartali dor. Mit Bartali un Coppi sünd de beid woll gröttsten italieensch Radrennfohrer vun hör Tiet upnanner drapen – un dat entwickel sück de berühmte Rivalität in de Radsporthistorie, un de riesig italieensch Fangemeend deel sück in de Lager vun de „Bartalisten“ un de „Coppisten“.

Privates un Dood vör de Tiet

Coppi sien Loopbahn weer aber ok vun Schicksalsslääg präägt: 1951 is sien jüngere Bröer Serse, ok Radrennfohrer, nah en Störrt to Dood kommen, un ok sien beid Süsters sünd jung an Johren storven. Fausto sülvst hett sück in sien Karriere ok talllos Knakenbröök un swoor Verletzungen totrucken.

1953 wurr publik, dat Coppi sien Ehefru verlaaten harr, um mit de ebenfalls verheiraadt Giulia Occhini, de so nömmt „dama bianca“, tosommen to leven. In dat Italien vun de 1950er Johren weer disse Liaison, ut de en Söhn, Faustino, stamm, en Schandaal. Sülvst de Paapst hett apenlich fordert, dat Coppi weer to sien Fru torüchkehren sull. Beid wurrn wegen Ehebröök un, wiel se sück wiegert hebbt, de Beziehung to beenden, to Bewährungsstraaf veroordeelt. Enn‘ 1959 hett sück Fausto Coppi bi en Rennen in dat afrikaansch Obervolta mit Malaria anstaken. Nah sien Rückkehr nah Italien is de Krankheit utbraken, de Erreger wurr in dat Krankenhuus eerst nich erkannt un Coppi is doran mit blots 40 Johren storven.

Literatur

• Walter Lemke: Fausto Coppi. 20 Jahre internationaler Radrennsport. Fuchs-Verlag, Miesbach 1999, ISBN 3000046879 (umfangriek Biographie mit Biller)

Weblenken

Fausto Coppi. Mehr Biller, Videos oder Audiodateien to’t Thema gifft dat bi Wikimedia Commons.

• DNB-Katalog
• Palmarès – List vun Siege un Platzeeren
• Fausto Coppi – en Porträt in Biller
• Fausto Coppi in de Datenbank vun Radsportseiten.net