Fabien Claude

Vun Wikipedia
Claude 2023 in Oberhof

Fabien Claude (* 22. Dezember 1994 in Épinal) is en franzöösch Biathlet. Claude wurr 2013 un 2014 Juniorenweltmeester un geev 2016 sien Debüt in’n Weltcup. Dor stunn he siet den Winter 2019/20 in mehreren Wettkämpen up dat Podest un fier in’n Januar 2021 sien eersten Sieg mit de Staffel. Bi de Olympisch Winterspelen 2022 wunn he mit de Staffel de Sülvermedaille. 2023 wurr he Staffelweltmeester.

Sportlich Loopbahn[ännern | Bornkood ännern]

Upstieg in den Weltcup (bit 2019)[ännern | Bornkood ännern]

Claude is in Basse-sur-le-Rupt in dat Département Vosges upwussen. In sien Jöögd hett he sowohl Skilangloop as ok Biathlon traineert un nehm 2012 in beid Disziplinen an den eerstmals utdragen Olympisch Jöögd-Winterspelen in Innsbruck deel. In’n Biathlon wunn he dorbi tosommen mit Léa Ducordeau, Chloé Chevalier un Aristide Bègue de Bronzemedaille in de Mixed-Staffel, wiels he in den Eenzelwettkämpen mit Platz 16 (Sprint) un 11 (Verfolgung) kien Top-Ten-Ergevnisse recken dee.[1] In den folgend Johren tell he to de internatschonal spoodrieksten Biathleten in sien Öllersklass: 2013 wurrr he mit de best Looptiet Jöögdweltmeester in’n Sprint. 2014 wurr he Juniorenweltmeester in de Verfolgung, een Johr later wurr he Weltmeester in’n Sprint.

Af de Saison 2014/15 hörr Claude to de franzöösch Kader för den IBU-Cup.[2] Dor reck he bi sien veerten Upträe eerstmals de Top Ten un wunn in’n Januar 2016 den Sprint in Nové Město na Moravě mit 3,6 Sekunnen Vörsprung up Timofei Lapschin, wobi he de flinkste Löper vun all weer. Direkt dornah keem he ok eerstmals in den Weltcup to’n Insatz, keem dor aber blots up Rang 96 rin[3]. In’n IBU-Cup keem he an’t Enn’n vun de Saison up Rang 7 vun de Gesamtwertung.

Claude bleev in de folgend Johren Deel vun den franzööschen B-Kader, kreeg aber ok immer weer Nomineeren för den Weltcup. 2017 nehm he as Ersatzlöper an de Weltmeesterschapen in Hochfilzen deel un hett anstäe vun den 10 Johr ölleren Simon Fourcade den Eenzelwettkamp bestreeden De Trainer vun de franzöösch Mannlüüdmannschap Stéphane Bouthiaux hett den Tuusch dormit begrünnd, dat he dorvan utgung, dat Claude in Tokunft fakener bi Grootereignissen intosetten un hüm de Mögelkeit geben wull, sück vör en grötter Publikum to bewiesen.[4] Bi dit Rennen keem he up den 25. Platz. Bit 2019 keem he in’n Weltcup mehrfack ünner de best 40 un kreeg dorför Weltcuppunkte, bleev aber ahn Top-Ten-Resultat. In‘n Gesamtweltcup belegg he de Plätze 55, 85 un 47, wobi he sück immer as överdörsnittlich Löper bewies, aber dat Scheeten leep bi hüm weniger goot. Dormit gelung hüm dat nich sück düersam in de A-Mannschap to kommen, in de Martin Fourcade, Quentin Fillon Maillet, Simon Desthieux un Antonin Guigonnat jewiels mehrmals up dat Podium keemen.

Fastsetten in de internatschonale Spitze (siet 2019)[ännern | Bornkood ännern]

Claude bi den Biathlon-Weltcup in Oberhof 2020

Biden Uptakt to de Saison 2019/20 keem Claude in dat 20-Kilometer-Eenzelrennen vun Östersund up Platz 7 un dormit eerstmals in de Top Ten. In de Staffel von Hochfilzen, in de he nah den Verzicht vun Fourcade un Desthieux beropen wurr[5], hett Claude de eenzige Straafrunn vun sien Team schaaten. Dennoch stunn he gemeensam mit Guigonnat, Émilien Jacquelin un Fillon Maillet as Dart eerstmals up en Weltcuppodest. In dat Eenzel vun Pokljuka gelung hüm dat noch eenmal, dorbi bleev he as een vun blots fief Athleten ahn Fehler. Blots Johannes Thingnes Bø un Martin Fourcade weer vör hüm. Bi de Weltmeesterschapen 2020 weer Claude weer Ersatzlöper un keem bi sien eenzigen Insatz (Eenzel) up Rang 19. Dissen Rang reck he an dat Enn’n vun den Gesamtweltcup un Rang 5 in den Eenzelweltcup.

In de Saisons tüschen 2020 un 2024 bestätigte Claude sien Spood in de Vörjohren mit regelmatigen Top-20-Platzeeren un eenzelt Podestergevnissen: Anfang Dezember 2020 wurr he in Kontiolahti achter Sebastian Samuelsson Tweet in de Verfolgung un belegg wenige Daag later Rang 3 in den Sprint vun Hochfilzen. As dart Löper in de Mannlüüdstaffel (an de Siet vun Desthieux, Fillon Maillet un Jacquelin) fier he an’n 15. Januar 2021 in Oberhof sien eersten Weltcupsieg. Ansluutend gungen sien Leistungen un Ergevnisse aber torüch, wat he sülvst up Fehler in de Vörbereitung up de Biathlon-Weltmeesterschapen 2021 torüchführen dee..[6] Bi de WM up de Pokljuka schaff he kien Top Ten-Resultat un verlor sien Staffelplatz an Antonin Guigonnat.[7]

In’n Winter 2021/22 nehm Claude regelmatig de Positschoon vun den Startlöper vun de franzöösch Staffel in. Tosommen mit Émilien Jacquelin, Simon Desthieux un Quentin Fillon Maillet wunn he bi de Olympisch Winterspelen 2022 in Peking de Sülvermedaille. Sien bitlang best olympisch Eenzelergevnis weer Rang 9 in’t Eenzel.[8] 2023 wurr Claude gemeensam mit Guigonnat, Jacquelin un Fillon Maillet in Oberhof Staffelweltmeister. As Teihnt vun den Gesamtweltcup weer he an dat Enn’n vun de Saison 2022/23 achter Fillon Maillet de tweetstarktste Franzoos vun dat Klassement. Buterdem fier he twee Weltcupsiege mit Mixed-Staffeln in ünnerscheedlich Besetten.

De Saison 2023/24 leep för hüm ehrder dörsnittlich. He reck in de Eenzelwettbewarfen nich eenmal dat Podium, weer aber mehrfach ünner de best Teihn. Een Weltcup-Sieg kunn he disse Saison aber noch mit den Mixed-Staffel an de Siet vun Julia Simon, Sophie Chauveau un Quentin Fillon Maillet in Oslo recken. Bi de Biathlon-Weltmeesterschapen 2024 keem he in de Verfolgung up den 10. Rang un in’n Massenstart up Rang 5. Mit de Staffel keem denn noch en Bronzemedaille dorto. An dat Enn’n vun de Saison keem he in den Gesamtweltcup up Rang 18.

De franzööösch Biathlon-Kommentator Loïs Habert hett Claude Anfang 2023 as düchtig muskulös un durchtraineert beschreeven. Mit en Körpergewicht vun över 80 Kilogramm tell he – as ok de Norweger Vetle Sjåstad Christiansen – to de kräftigsten Biathleten in‘n Weltcup. Dordör harr he en besünners Potential bi’n Sprint un up kört Strecken. Sien Teamkolleeg Émilien Jacquelin hett Claude in‘n Dezember 2021 ebenfalls as besünners explosiv un hett hüm mannschapsintern führend in‘t Krafttraining sehn.[9]

Persönliches[ännern | Bornkood ännern]

De Moder vun Claude Christine is en fröhere Skilanglöperin un Biathletin, de ünner annern bi de Weltmeesterschapen 1984 den achten Platz in dat Eenzelrennen beleggt hett. As Betrüerin vun den örtlichen Ski Club de Basse Sur Le Rupt ski nordique weer se de eerste Trainerin vun Fabien, sien öllere Bröer Florent un sien jüngere Bröer Émilien, de all dree Biathleten wurrn.[10] Florent Claude weer bit insluutend 2016 Liddmaat vun den franzööschen B-Kader un nehm 2017 de belgische Staatsangehörigkeit an; he wurr dor en vun de führend Athleten in dat belgisch Biathlonteam.

De Vader vun Claude, Gilles, weer Schreiner[11] un Motorsportler[10]. He is in’n Januar 2020 bi en Schneemobilexkursion in’n Norden vun Québec to Dood kommens. Wiels de Daag, in de he as verschwunnen gull, stunn Fabien Claude in dat Eenzelrennen vun Pokljuka eerstmals up dat Weltcuppodium. Dissen Spood hett he denn sien Vader widmet.[12][13] Ansluutend hett he up den Start bi dat Massenstartrennen verzicht un is nah Frankriek fohren[14], wo de Familie de Nahricht över den Dood vun den Vader kreeg. In en Interview wiels de Weltmeesterschapen in den Folgemaand hett he de dortige Deelnahm as Mögelkeit sehn, vun de Truur to flüchten un sien Leben wiedertoführen (in‘t Original: „C’est un bon moyen de s’évader ici et de continuer sa vie. Ici, c’est grandiose.“).[15]

Weblinks[ännern | Bornkood ännern]

Fabien Claude. Mehr Biller, Videos oder Audiodateien to’t Thema gifft dat bi Wikimedia Commons.

Enkeld Nahwiesen[ännern | Bornkood ännern]

  1. ↑ Erfolgsöversicht up fabien.claude3brothers.fr. Afropen an’n 8. April 2020.
  2. ↑ Composition Collectifs Nationaux Biathlon 2014/2015 up ffs.fr. Rutkommen an’n 15. Mai 2014. Afropen an’n 8. April 2020.
  3. ↑ BMW IBU WORLD CUP BIATHLON – 2015/2016 RUHPOLDING – MEN 20 KM INDIVIDUAL – Competition Analysis in de IBU-Datenbank. Afropen an’n 8. April 2020.
  4. ↑ AFP: Mondiaux Hochfilzen: Fin de compétition pour Simon Fourcade, remplacé par Fabien Claude auf eurosport.fr. van’n 13. Februar 2017. Afropen an’n 8. April 2020.
  5. ↑ Coupe du monde : Le relais français sans Martin Fourcade ni Simon Desthieux à Hochfilzen dimanche up lequipe.fr. van’n 14. Dezember 2019. Afropen an’n 8. April 2020.
  6. ↑ Valéry Tuaillon: Fabien Claude termine la saison à moitié comblé up vosgesmatin.fr. 21. März 2021.
  7. ↑ Florian Burgaud: Biathlon | Fabien Claude : retour sur une saison contrastée up nordicmag.info. 8. April 2021.
  8. ↑ Hugo Girard: Fabien Claude, en route vers les sommets auf vosgesmatin.fr. 7. April 2022. Abgerufen am 15. April 2022.
  9. ↑ Simon Farvacque: Coupe du monde | Östersund | "Il ne manque qu'une étincelle" : Fabien Claude, l'heure de la victoire ? up eurosport.fr. 9. März 2023. Afropen an’n 8. April 2023.
  10. ↑ a b Les frères Claude ensemble sur le net up nordicmag.info. van‘n 27. November 2015. Afropen an’n 8. April 2020.
  11. ↑ Marie Coulon: Accident de motoneige au Québec : le corps retrouvé est celui de Gilles Claude, 58 ans up francetvinfo.fr. van’n 25. Januar 2020. Afropen an’n 8. April 2020.
  12. ↑ "Wir lieben dich, Papa" up spiegel.de. van‘n 24. Januar 2020. Afropen an’n 8. April 2020.
  13. ↑ Jean-Pierre Bidet (L’Équipe): Coupe du monde : Fabien Claude 3e de l'indivduel de Pokljuka après la tragique disparition de son père up lequipe.fr. van’n 24. Januar 2020. Afropen an’n 8. April 2020.
  14. ↑ Mass start de Pokljuka : quels Français au départ avec Martin Fourcade ? up ledauphine.com. van’n 26. Januar 2020. Afropen an’n 8. April 2020.
  15. ↑ Benoit Prato: Fabien Claude : "C’est dommage d’être obligé de vivre ce genre de drame pour grandir d’un coup" up ledauphine.com. van’n 19. Februar 2020. Afropen an’n 8. April 2020.
Vun „https://nds.wikipedia.org/w/index.php?title=Fabien_Claude&oldid=1013951“