Ernst-August von der Wense
Ernst-August von der Wense (* 11. Januar 1899 in Nigenstrelitz; † 30. Januar 1966 in Ellerbrook) weer en düütschen Politiker von de Düütsche Partei.
Von der Wense is 1899 in Nigenstrelitz boren un weer eerst bet 1911 op dat Gymnasium Nigenstrelitz un denn bet 1917 op dat Gymnasium Adolphinum in Bückborg. Na dat Abitur 1917 weer he Soldaat in’n Eersten Weltkrieg. Na’n Krieg hett he bet 1922 Volks- un Forstweertschop an de Universitäten in München, Heidelberg und de Forstakademie Münden studeert. Na dat Studium hett he en praktische Lehrtied maakt un denn 1924 den Bedriev von sien Vader in Wens övernahmen.
1935/1936 müss de Familie von der Wense ut Wens weg, as de Wehrmacht dor den Truppenübungsplatz Bergen inricht hett. He is denn na Ellerbrook tagen un hett dor in’t Holt von de Wingst Forstweertschop bedreven. De Forsten harrn vörher de Familie von Bremer tohöört, de 1931 mit Charlotte Sophie Stuart von Bremer utstorven is. Von 1939 bet 1940 weer he Soldaat in’n Tweten Weltkrieg.
He weer von 1946 bet 1952 Börgermeester von de Gemeen Wingst un von 1948 bet to’n 30. Januar 1966 Landraad von’n Landkreis Land Hadeln. Von 1955 bet 1959 weer he in de drüdde Wahlperiood för’n Wahlkreis Hadeln Maat von’n Neddersassischen Landdag.
He weer verheiraadt mit Mechthild von der Wense, borene von Maltzahn (1906–1998), un harr mit ehr söss Kinner.
In Ellerbrook is de Ernst-August-von-der-Wense-Weg na em nöömt.