Eosinophil Granulozyt

Vun Wikipedia
Wesseln na: Navigatschoon, Söök
Eosinophil Granulozyt

Eosinophile Granulozyten – kort warrt dor ok Eosinophilen to seggt – höört to de Leukozyten. Se maakt ruchweg 1 bit 5 Prozent vun de Zellen in’t Differentialbloodbild ut un hebbt Andeel an de zellulären Immunafwehr. Se hebbt jemehrn Naam vun den Farvstoff Eosin, mit den se infarvt warrn künnt. Eos is ooltgreeksch un heet so vell as „Morgenroot“.

Eosinophile Granulozyten bragt binnen in Vesikel, de ok Granula nöömt warrt un basische Proteinen – t. B. dat Major Basic Protein, lysosomale hydrolyytsche Enzymen un Peroxidasen – bargt. De Inholt vun de Granula kann dör Exozytoos an de Ümgegend afgeven warrn. Utlösers dorför sünd ünner annern Antikörpers vun de IgE-Klass. Bito hebbt se ok de Anlaag to’n Chemotaxis. Dat bedüüt, dat se sik as Amöben in de Richt vun en locken Stoff (Attractant) bewegen künnt. Blangen de toxischen Wirken vun jemehr Granula hebbt Eosinophilen ok dat Vermögen för de Phagozytoos.

De Eosinophilen speelt en grote Rull bi de Afwehr vun Parasiten in’n Lief. Glieks, wenn de Böverflach vun’n Parasit mit IgE besett is, binnt sik de Eosinophilen doran. Dat dennt as Reiz to’n Freesetten vun den toxischen Inholt vun de Granula. Blangen den Schaden vun’n Parasiten wirkt de exozyteerten Proteinen gliektietig ok as Lockstoff för wietere Eosinophilen, so dat de Afwehr noch starker warrn kann.

Man, Eosinophilen künnt ok Schaden an egen Organismus maken. Bi Asthma bronchiale warrt to’n Bispeel dat Epithel vun de Lungen dör de basischen Inholtsstoffen angrepen. Rore dör eosinophile Granulozyten utlöste Krankheiten sünd de eosinophile Fasciitis, dat Hypereosinophile Syndrom as ok de eosinophile Ösophagitis.

Physioloosch sünd de Eosinophilen in de lymphozytär-eosinophilen Heelphaas vermehrt. Ok bi Allergien hebbt se en högere Tall, so dat de so nöömte Eosinophilie en wichtigen Indikater is för dat Optreden vun en Allergie. En minnerte Tall vun Eosinophilen warrt Eosinopenie nöömt.

Borns[ännern | Bornkood ännern]