Elv-City-Jet

Vun Wikipedia
Zur Navigation springen Zur Suche springen
De Hansestar 2007
De fröhere Hanseblitz as SuperCat 30 op de Philippinen (2011)
De fröhere Hansepfeil as SuperCat 32 op de Philippinen (2009)

De Elv-City-Jet (Elbe-City-Jet Schnellfähren GmbH & Co. KG) weer en Ünnernehmen, dat Fähren op de Ünnerelv twüschen Cuxhoben un Hamborg bedreven hett.

Historie[ännern | Bornkood ännern]

De Elv-City-Jet hett 1994 sien Anfang nahmen. Dat Ünnernehmen Schiffskontor Altes Land (SAL) ut Steenkark ünner Reeder Hans Heinrich hett in’n Oktober/November över dree Weken den Testbedriev mit de Sea Shuttle I opnahmen. In düsse Tied kunn dat Ünnernehmen 14.000 Passageers transporteren.[1]

De normale Bedriev hett denn 1996 mit de twee Katamaraans Hanseblitz un Hansepfeil anfungen.[2] De beiden Scheep weren von 1996 bet 1999 op de Lien StodersandLühanlegger – Hamborg-Lannungsbrüggen ünnerwegens.

Dat Ünnernehmen hett to je 50 % SAL un de Förde Reederei Seetouristik (FRS) ut Flensborg tohöört.[3]

1997 hett de Elv-City-Jet dat Schipp Hansestar tokregen, dat de Lien von Cuxhoben na Hamborg övernahmen hett. In Cuxhoben weer de Fähr anbunnen an’n Helgoland-Verkehr mit de Wappen von Hamburg. 1999 is de Hansestar op de Lien von Stodersand na Hamborg wesselt. De Hanseblitz un Hansepfeil sünd 1999 an Flevo Ferries (bedreven von de GVB in Amsterdam mit verscheden Partners) verchartert worrn un weren op dat Iesselmeer ünnerwegens. Dat Ünnernehmen Flevo Ferries is aver al in’n Februar 2000 bankrott gahn. Nadem de beiden Fähren ut de Nedderlannen trügg weren, sünd se dat Johr 2000 dör wedder twüschen Stodersand un Hamborg föhrt un hebbt sik mit de Hansestar afwesselt. Utgangs 2000 sünd de beiden Scheep an Transtejo na Portugal verköfft worrn un sünd dor op’n Tejo bi Lissabon föhrt. 2008 sünd de beiden Scheep an Supercat op de Philippinen verköfft worrn un loopt dor nu för 2GO.

De Hansestar hett de Lien von Stodersand na Hamborg denn alleen bedeent. De Ibis III, de in’n November 2001 op’n Naam Hanseblitz (II) ümdöfft worrn is, weer von 2001 bet 2003 op de Lien von Stodersand över Brunsbüttel na Cuxhoben ünnerwegens. De Lien is 2003 instellt worrn un dat Schipp is in’n März 2003 na Kroatien verköfft worrn un föhrt dor as Nikolina.

To’n 1. Mai 2003 hett Eegner un Koptein Klaus Suhr ut Drochters den Elv-City-Jet von SAL övernahmen.[2] Suhr weer vörher as Schippsföhrer anstellt bi SAL.

2007 weer dat denn ganz ut. De Elv-City-Jet hett den Bedriev instellt. De Hansestar is in de Nedderlannen verköfft worrn un weer dor denn insett twüschen Harns un Terschelling.

Footnoten[ännern | Bornkood ännern]

  1. Lloyd's Ship Manager. volume 15, Lloyd's of London Press, London 1994, Sied 185
  2. a b Thomas Sulzyc: Elbe-City-Jet steht vor dem Verkauf, Hamburger Abendblatt an’n 20. März 2008
  3. Nach Stade mit kleineren Fähren, Hamburger Abendblatt an’n 9. März 2000