Elljeroe

Elljeroe is ene Stadt in’n Landkreis Harz in Sassen-Anhalt. Blangen Elljeroe sülvst (Ökelnaam för de Elljeroers: Langschlapers) höört ok de Öörd Könnigshütte (Ökelnaam Potterköppe) un Reubeland to de Gemeen.

Historie

Dat eerste Maal in de Oorkunnen vör kummt Elljeroe 1206 as Alvelincherot in ene Oorkunn vun Paabst Innozenz III. för dat Sticht Ganderssen.

De Inwahners vun Elljeroe hebbt den Ökelnaam Langschlapers. Vör lange Tiet, so geiht de Geschicht, schall een bi’t Swienhöden bi de Grenz vun Elljeroe na Hüttenroe de ole gollene Karkenklock vun dat fröhere Dörp Ertfelle funnen hebben. Nu weren Buurn ut beide Dörper in de Neegd togang un mank jem güng dat man glieks los, ’keen schull de Klock kriegen? Se möken also af, dat se sik annern morgen Klock söss wedder bi de Klock drepen wullen. Un so güngen se dor vun af. Annern morgen weren de Lüüd ut Hüttenroe Klock söss bi de Klock. Blot vun de Lüüd ut Elljeroe weer nix to sehn. Kemen un kemen nich. Harrn verslapen. Do hebbt de Hüttenroers de Klock op jemehrn Wagen stellt un sünd mit de Klock lostagen. So op halven Weg kemen dor aver opmal de Elljeroer op Sicht. Mit halsbrekern Tempo jagen se de Hüttenroer achterher un wullen jem inhalen. Do müssen de Hüttenroer sik spoden. Doch jüst do dee sik an’t achtere Rad en Splint lösen. Wenn dat Rad nu rafpultern dee, denn harrn de Elljeroers jem kregen. Aver verwegen as se sünd, do steek een vun de Hüttenroers sien Duum in’t Lock un so kunnen se ganz na Hüttenroe trüchkamen un de Elljeroers hebbt jem nich mehr kregen. Blot de Keerl, de mit sien Duum den Wagen an’t Lopen hollen harr, de mark nu mit groot Weehdaag, dat vun sien Duum man blot noch en Stuup nableven weer. Vun de Tiet an harrn de Hüttenroers jemehrn Naam Stupedumen weg un de Elljeroers, de to laat kamen weren, heten nu jümmer Langschlapers.

Weblenken

Websteed vun de Stadt (hoochdüütsch)