Ehrhardt Post

Vun Wikipedia

Alfred M. Ehrhardt Post (* 23. September 1881 in Cottbus; † 1. August 1947 in Berlin) weer en düütsch Schachmeester un -funktschonär.

Schachloopbahn[ännern | Bornkood ännern]

Post, vun Berop Amtsafkaat, reck sien eerst grooten Turniererfolg 1907 in Berlin, as he den 2. Platz achter Richard Teichmann belegg, sück aber vör Rudolf Spielmann, Paul Saladin Leonhardt, Dawid Przepiórka un annern platzeeren kunn. 1910 wunn he dör en Wettkampsieg (+6 =3 −3) gegen den bitherigen Titelholler Wilhelm Cohn de Meesterschap vun Berlin.

1921 weer he Eerster bi den 21. Kongress vun den Düütschen Schachbund, wat gliekbedüüdend mit de Düütsch Meesterschap weer, vör Friedrich Sämisch, Willi Schlage un annern.[1] Dissen Erfolg kunn he een Johr later in Bad Oeynhausen wedderhalen, up Platz 2 keem Carl Carls.[2] 1923 bi den Kongress in Frankfort an’n Main deel he sück mit Heinrich Wagner den 2. Platz achter Ernst Grünfeld.[3]

Tätigkeit as Schachfunktschonär[ännern | Bornkood ännern]

Siet 1911 weer Post all Präsident vun de Berliner Schachgesellschaft. As Funktschonär is he besünners dör sien düütschnatschonale Instellung hervörtreeden. So hett he sück bi den Kongress vun den Düütschen Schachbund 1914 in Mannheim gegen de Grünnen vun en internatschonalen Schachorganisatschoon wennd un hett den Andrag, de Tall vun utlännsch Speler bi Meesterturnieren to beschränken, ünnerstütt. Bi den Kongress 1920 in Berlin is he bi de Wahl to’n Vörsitter vun den DSB düütlich gegen Walter Robinow ünnerlegen. Vun sien Amt as 2. Vöörsitter is Post Enn‘n 1922 nah wiederen Querelen torüchtreeden. As de DSB 1933 dwangswies in den Grootdüütschen Schachbund upgung, wurr Post Stellvertreeder vun den Bundesleiter Otto Zander un weer an de Gliekschaltung vun Schachorganisatschonen un de Utgrenzen vun jöödsch Liddmaaten bedeeligt. 1939 wurr he ünner Bundesleiter Franz Moraller to’n Geschäftsföhrer nöömt un kunn in disse Funktschoon de Tätigkeit vun den GSB in de folgend Johren mit meest unbeschränkt Machtfülle lenken, ofschons he formal un protokollarisch immer tweet Mann in de Verbandshierarchie bleev.

Sien Dood 1947 wurr in de Schachpresse blots kört mitdeelt.

Studienkomponist[ännern | Bornkood ännern]

Tüschen 1934 un 1939 hett Post eenige Schachstudien herutbrocht, de meesten dorvan in den Deutschen Schachblättern. Allerdings harrn se den Charakter vun praktisch Schachendspelen.

Literatur[ännern | Bornkood ännern]

  • Post sien Turniererfolge in Dr. P. Feenstra Kuiper: Hundert Jahre Schachturniere 1851-1950, W. Ten Have n. V., Amsterdam 1964.

Weblinks[ännern | Bornkood ännern]

Enkeld Nahwiesen[ännern | Bornkood ännern]

  1. Deutsche Schacheinzelmeisterschaft 1921 in Hamburg up TeleSchach (Krüüztabell un Partien)
  2. Deutsche Einzelmeisterschaft 1922 in Bad Oeynhausen up TeleSchach (Krüüztabell un Partien)
  3. Deutsche Schacheinzelmeisterschaft 1923 in Frankfurt/Main up TeleSchach (Krüüztabell un Partien)