Eerdbevenswarm
Eerdbevenswarm oder Swarmbeven is in de Seismologie de Beteken för en sünnere Oort vun Eerdbeven, de as Reeg oder Kluuster opduken doot. Dorbi passeert in en sünnert Rebeet vun de Eerdköst en mehr oder minner grote Tall vun Eerdbeven in en afgrenzten Tietruum, de verscheden lang wesen kann. Eenige Eerdbevenswärm duert en poor Daag, annere künnt bit to en Johr anduern. De Magnitude vun de enkelten Beven is dorbi tomeist ruchweg gliek.
Tyypsch för Swarmbevens is dat langsome an- un afswellen vun de seismischen Aktivität, för dat opstunns noch keen kloren Tosamenhang funnen worrn is. Dat Sünnere bi disse Form vun Aktivität is, dat de Magnituden keen groten Ünnerscheed opwiest. Dormit kann een hier nich ünnerscheden twüschen Vör-, Hööft- der Nabeven, as dat bi tektoonsche Eerdbeven normalerwies mööglich is.
De Begreep Eerdbevenswarm is 1899 to’n eersten mol vun Josef Knett in en Opsatz över en Kluustern vun mehr as 100 makroseismisch faststellte Eerdbeven in’t Rebeet Vogtland/Westböhmen bruukt worrn, wat sik 1824 över en Tiet vun ruchweg fief Weken afspeelt hett. In’t Vogtland un Böhmen kummt dat jümmer wedder to Eerdebevenswärm. So is över Swarmbevens in’n Winter 1985/86 bericht worrn, as ok in’n Harvst 2000, in Oktober 2008 un in August un September 2011.[1] Dat bit hüüt starkste Eerdbeven in dat Rebeet weer an’n 14. Oktober 2008 meten[2], dat en Magnitude vun 4,1 op de Richterskala harr. Dat Epizentrum weer dicht bi de tschech’schen Stadt Nový Kostel in en Deep vun 8–10 km.
Weltwiet kann man seggen, dat Swarmbeven vör allen in Rebeden vörkamt, de vulkaansch aktiv sünd. De Forschung nimmt dorüm an, dat dat Opstiegen vun Fluiden in de Eerdköst de Eerdbevenswärm utlösen doot. Wenn disse Fluiden neemlich över Splitten un Reten in’n Steen opstiegen doot, ännert sik de Porendruck un dormit togliek ok dat Spannungsfeld, wat denn to’n Breken vun’n Steen föhren kann. Eerdbevenswärm kann een ok künstlich utlösen, wenn en Fluiden över Bohrlöcker föddern oder in’n Ünnergrund pumpen deit. Swärm in Form vun Mikroseismik sünd to’n Bispeel al bi’t Föddern vun Eerdööl beobacht worrn, as ok bi Druckexperimenten in depe Bohrlöckers.
Blangen dat Vogtland höört in Düütschland ü.a. ok de Hochstaufen bi Bad Reichenhall to de Rebeden, woneem dat Swarmbevens gifft. Dor hett sik sogor wiest, dat Eerdbevenswärm ok dör starke Regenfäll utlööst warrt.[3]
Borns
[ännern | Bornkood ännern]- ↑ Axel Bojanowski: Erdbebenserie lässt Vogtland zittern op Spiegel Online vun’n 5. September 2011 afropen an’n 5. September
- ↑ Bericht mit Video to de Oorsaak vun Swarmbevens vun’n Oktober 2008, Vogtland, 23. November 2008
- ↑ uni-protokolle.de: Wenn es in Bayern Erdbeben regnet – Niederschlag kann seismische Instabilität auslösen, Uni München, 2. November 2006
Weblenken
[ännern | Bornkood ännern]- geo.de: Interview: Schwarmbeben in Deutschland 2008, 10. Oktober 2008
- Woans enstaht Eerdbeven / Swarmbeven in’t Vogtland? (hoochdüütsch)