Eduard Großheim
Eduard Großheim (* 24. September 1900 in Tettenborn; †) weer en düütschen Politiker von de NSDAP.
Großheim is 1900 in Tettenborn boren.[1] Von November 1917 bet Januar 1919 hett he Deenst bi’t Militär daan.[1] He hett Bookholler lehrt un weer von 1. Januar 1921 bet 28. Februar 1930 Rieksbeamten bi de Finanzbehörd.[1] Von 1. März 1930 bet 31. Mai 1932 weer he Kommunalbeamten in Weißwasser.[1] He is denn to’n 1. Juni 1932 Börgermeester in Mühlberg/Elbe worrn un dat bet to’n 6. Mai 1934 bleven.[1] An’n 1. Mai 1933 is he in de NSDAP rin.[1]
He hett an’n 7. Mai 1934 von Werner Glüer dat Amt as Börgermeester von de Stadt Buxthu övernahmen.[1] Nadem de Börgermeester von Stood, Carl Nörtemann, 1943 na de Wehrmacht intagen worrn is un en Tied lang Eduard Kühl dat Amt övernahmen harr, hett Großheim von’n 6. Juli 1943 bet 1945 ok düt Amt övernahmen.[1] An’n 19. Februar 1945 is he as Börgermeester von Buxthu afsett worrn, nadem he ahn Verlööv Levensmiddel afgeven harr.[1] He weer denn alleen för Stood tostännig. Dor is he Börgermeester bleven, bet de Allieerten de Stadt innahmen un Großheim afsett hebbt. Von’n 1. Oktober 1939 bet Februar 1943 weer Großheim ok Baas von de NSDAP-Oortsgrupp Buxthu.[1]
Nadem de Briten em fastnahmen harrn, weer he von’n 4. Mai 1945 bet 1947 in Builefeld interneert. Bi de Entnazifizierung 1947 is he to en Geldstraaf veroordeelt worrn.[1]