Dune du Pyla

Vun Wikipedia

De Dune du Pyla an de Küst vun’n Atlantik bi Arcachon in Frankriek is de gröttste Düün in Europa.

Se löppt vun Noorden na Süden un is bet to 117 m hooch, 500 m breed, üm un bi 2,7 km lang. Ehr Volumen warrt dormit op bi 60 Millionen m³ taxeert. De Düün liggt an’t Becken vun Arcachon süden de Stadt Arcachon un den Oort Pyla sur Mer, güntsiet dat Cap Ferret. Op de westen Siet to de See hen stiggt se mit 5 bet 20 Graad an, op de oosten Siet mit 30 bet 40 Graad.

Historie[ännern | Bornkood ännern]

Meer, Wind, de Waterströöm, Störm, Tieden un toletzt ok de Minsch hebbt de Düün foormt. Ehr innere Struktur wiest, dat se sik vör üm un bi 18.000 Johren billt hett un de verscheden Klimata un Planten in de nakamen Tieden hebbt ehr Sporen trüchlaten.

Hüüt is de dör’n Wind transporteerte Meng Sand ringer un de Düün dorüm sieder, aver de Tieden, de Erosion un de Wind sorgt dorför, dat sik wieder in’n Süden bi Petit-Nice en ne’e Düün billt.

1994 hett de Gemeen La Teste-de-Buch beslaten, den Noorddeel vun de Düün stabiler to maken. Mit Bulldozers hebbt se dat Profil vun de Düün ännert, hebbt lütte Palisadentüün opboot un Braam, Strüker un Pinien plant. Na fief Johren wies sik, dat dat Projekt klappen dei. De Planten hebbt de Düün faster maakt un se op ehren Weg na de Hüüs opholen.

In’n Süden aver warrt veel Sand anweiht un de Düün is temlich aktiv. Dör en Bresche, dör de de Wind tocht, sünd de 1994 opboten Tüün kaputt gahn. De Düün freet wieder den Woold, de achter ehr liggt.

Tourismus[ännern | Bornkood ännern]

Hüüt besöökt elk Johr bi twee Millionen Touristen de Düün. De Foot vun de Düün is to’n gröttsten Deel mit Fuhren bewussen. Op de Achtersiet vun de Düün liggt Parkplätz, so dat se mit’n Auto bequem anlangt warrn kann.

De Gegend is ok vun groot ökoloogsch Intress, un de 6800 ha Düün mit 4000 ha Woold rundrüm sünd dorüm siet 1978 en Rebeet mit Naturschuul.

Weblenken[ännern | Bornkood ännern]


Koordinaten:44° 35,40′ N, 1° 12,7′ W