Dor kummt een Schipp

Vun Wikipedia
Zur Navigation springen Zur Suche springen

Dor kummt een Schipp mit den Ünnertitel Plattdüütsch Gesangbook is en handlich plattdüütsch Gesangbook för de Lutherschen un reformeerten Karken in de Gegenden vun Düütschland, wo Platt snackt warrt. Up 384 Sieten finnt sik dor 260 plattdüütsche Karkenleder. Rutgeven is dat vun de Arbeitsgemeenschop vun plattdüütsche Pastoren in Neddersassen. Rutkamen is dat 1991 in den Verlag vun de Misschoonshannel Harmsborg. 2009 hett dat Book en drüdde Uplage sehn. De is rutbröcht wurrn vun Anita Christians-Albrecht un Walter Scheller.

Wat dor in steiht[ännern | Bornkood ännern]

In dat Lederbook steiht toeerst mol in, wat dor in to finnen is (S. 5-14). Denn kummt en Deel, wo vörslahn warrt, wie dat mit den Afloop vun en plattdüütschen Gottesdeenst utsehn kann un wat dor tohöört (Liturgie up S. 15-36). Dorna kaamt denn de Leeder un noch en Anbacksel.

De Deel mit de Leeder is unnerdeelt in 27 Afsnitten. Dor finnt sik 260 Leeder in, dormank ok seven Leeder „ut de kathoolsche Kark“. To de Leeder mit all Strophen sünd de Melodien (tomeist mit bloß eene Stimm) afdruckt.

In den Anhang staht de Borns in (S. 360-375), dorto weert na dat Alfabet de hoochdütschen Leeder vertekent, de dor översett wurrn sünd (S. 376-379) un denn kümmt noch en Woort achteran vun Paster Heinrich Kröger ut Soltau.

Wie dat Book tostannkamen is[ännern | Bornkood ännern]

Heinrich Kröger schrifft in sien „Nahwoort“, wie dat Book tostanne kamen is:

De Arbeitskreis „Plattdeutsch und Kirche“ an de Theologische Akademie Celle hett sik nah twee Andachtsböker, een Gebedbook un de Tietschrift „De Kennung“ (bet 1982) nah Johr un Dag ok an een neet Gesangbook ranwaagt. 1986 hett de Hannöversche Landeskark Johann Diedrich Bellmann (Nindörp bi Buxthuud) för disse Opgaav freestellt. Mit em sünd dree Studentinnen un twee Studenten an de Arbeit gahn:
Michael Andersohn, Otterbarg
Christel Bakker-Bents, Accm
Kerstin Marks, Celle
Christa Naatjes, Spekedorp bi Auerk
Bernd Reinecke, Hannover
bet se nah un nah dör Examen un anner Ursaak opgeven müssen. Dat lest Johr harr J.D. Bellmann de Arbeit alleen. Op den Pastorendag 1989 in Sievershausen kunn he dat noordneddersassische Manuskript mit 160 Leeder an de Arbeitsgemeinschaft för plattdüütsche Pastoren in Neddersassen övergeven, dat se lest Hand anlegg un de Vörlaagen för den Druck trechmaak.
De Vörstand von de Arbeitsgemeinschaft hett een Redakschoon von acht Lüüd tohoopropen:
Dr. Ernst Arfken, Göttingen
Sup. Dieter Baden, Loxt
Dr. Inge Bichel, Kiel
Prof. Dr. Ulf Bichel, Kiel
Hinrich Hannken-Illjes, Wulsbüttel (Protokoll)
Christa Klußmann-Merten, Paane
Pastorin Annedore Wendebourg, Stood
Landeskirchenmusikdirektor Gottfried Wiese, Celle
Twölfmol - över een Johr verdeelt - is de Redakschoon in Soltau tohoopkamen.
In de Twüschentiet harr sik in Oostfreesland, wo dat von de Oostfreesche Landschaft... un von enkelte Christen lüttje Gesangböker geven deit, lutherische un reformeerte Pastoren to’n Krink Plattdüts in d' Kark tohoopfunnen. Se hebbt in allerhand Dagfohrten jüm ehr Leeder överhaalt un för dat Gesangbook tohoopstellt. Bi'n tweeten Dörgang dör dat Celler Manuskript is
Pastor Jan-Lübbert Billker, Ollersum
to de Redakschoon mit tokaamen un hett an passen Städen de oostfreeschen Gesangen un Psalmen mit inbröcht. An de 70 sünd övernahmen un in't Register mit (o) antekent. To'n Glück drööpen ok noch je dree Gesäng ut dat Oostfäälische un ut Westfalen in...To'n ierstenmol in uns Johrhunnert is bi jedeen Leed de Melodie mit afdruckt... (Schrievwies original).

Kiek dor mol rin[ännern | Bornkood ännern]

Literatur[ännern | Bornkood ännern]

  • Arbeitsgemeinschaft plattdeutscher Pastoren in Niedersachsen (Hrsg.): Dor kummt een Schipp. Plattdüütsch Gesangbook. Harmsborg 1991; ISBN 3-87546-066-9; 384 S.