Diskuschoon:Immen

Ik wull graad de Interwikilenken nadragen. Aver wat is dat Thema vun dissen Artikel? Is he över de:Bienen, de:Honigbienen oder över de:Europäische Honigbiene??? Wikipedia-Artikels sünd jümmer över een Taxon ut de Biologie. --::Slomox:: >< 15:40, 25. Jan 2006 (UTC)

Wenn een up Platt wat över Immen vertellt, denn meent he natüürlich de Honnigimmen, un dat kummt in mienen Artikel jo woll düütlich to'n Vörschien. Wat schall dat den heten: "Wikipedia-Artikels sünd jümmers över een Taxon ut de Biologie? Kannst du di nich en beten verständlicher utdrücken? Ik hebb mal bi anner Artikels över Deerter nakeken (t.B. bi Zeeg un Hund) un bün nix slauer wurrn. Ik glööv, ik mööt dat Schrieven för de plattd. Wikipedia togeven.--84.129.210.250 17:11, 25. Jan 2006 (UTC)

De baven nöömten Veecher sünd allens Immen. Un de:Honigbienen un de:Europäische Honigbiene sünd ok beid Honnigimmen. Wat en Taxon in de Biologie is, steiht ünner de:Taxon. Wenn wi Enzyklopädie-Artikels över Deerter schrievt, denn mööt wi ok en lütt beten mit de bioloogschen Fachbegrepen arbeiden. Zeeg un Hund sünd dor nich de besten Bispelen. Kiek mal bi Kraan. Dor is op de rechte Siet en Box, wo de Taxons för den Kraan wiest warrt. Wichtig is, bi so'n Bio-Artikel jümmer den korrekten latienschen Naam bitoschrieven (op't best kiekst vörher bi'n hoochdüütschen Artikel rin, de hebbt temlich vele gode Bio-Artikels). --::Slomox:: >< 18:32, 25. Jan 2006 (UTC)

Plattdüütsch un Wetenschap

Nu heff ik begrepen, dat de plattdüütsche Wikipedia nich dat is, wat ik mi een Johr lang darünner vörstellt heff. Se is nich ene Enzyklopädie för de Lüüd, de geern mal wat up Platt leest, sunnern se will waraftig en wetenschaplicht Wark wesen, en Wark, dat kien Minsch bruukt, denn all Plattsnackers verstaht ok Hoochdüütsch un köönt wetenschapliche Fragen veel beter in de hoochdüütsche Wikepedie naslaan. Plattdüütsch is kiene Spraak, in de een wetenschapliche Saken afhanneln kann. Ik heff ganze Romaans in Platt schreven. Dor weer nix bi, aver sobold ik wetenschapliche Themen upgriepen wull, keem ik an ene unöverwindliche Grenz. För wetenschapliche Afhanneln fehlt dat an Dusende vun Fachbegrepen un moderne Wöör. Dat is al doran fasttostelln, dat enen hoochdüütschen Schriever 50000 Wöör to Verfögen staht, enen plattdüütschen aver man bestenfalls 5000. Vele Schrievers in de plattdüütsche Wikipedia maakt den Indruck, as of se nich mal dusend plattdüütsche Wöör in ehre Schattkist hefft, aver se troot sik dat to, dormit plattdüütsche Artikels to schrieven. Wat dorbi rutkummt, is faken nich veel weert. De Kunst, för en Woort, dat dat in Platt nich gifft, en Umschrieven to fomuleren, verstaht de meisten nich. Se denkt nich in Platt, sünnern in Hooch un stuukt sik sülvst Wöör torecht, so as se dat in Hooch wennt sünd. Dat wetenschapliche Utsehn kriggt so'n Maakwark denn mit vele Fremdwöör un Fachbegrepen, de villicht en Akademiker versteiht, aver nich en Plattsnacker, de den Artikel ut Leev to de Spraak leest. Wenn he wetenschapliche Intressen hett, denn is dat beter, he kickt in de hoochdüütsche Wikipedia na. Nehmt wi mal dat Bispill "Immen"! En plattdüütschen Imker kann di veel vertellen över de Honnigimmen un vun de Imkeree, aver fraag em is na de bioloogsche Systematik! För "Hautflügler" un "Neuflügler" gifft dat kien plattdüütsch Woort. Dat Woort "Wespentaille" kann een in 't Plattdüütsche övernehmen, aver wat dor sünst noch in dat "Taxon " steiht: all de latienschen Naams för de Klass, de Familie, de Aart, un wat weet ik, de argert den plattdüütschen Leser mehr as schetterige Smeerplecken. As ik dor achter keem,dat miene plattdüütschen Artikels bi de Admins vun de Wikipedia nich so recht ankemen, wiel se nich den "pseudowetenschaplichen" Anschien harrn, is mi de Lust an dat Schrieven vergahn. Ik vertell geern wat up Platt, aver mit echt plattdüütsche Wöör un nich mit ene Spraak, de blots en översett Hoochdüütsch is un dorto ok noch mit latiensche Brocken so deit, as of se wetenschaplich weer.

Dat mag verdreiht klingen: Ik heff nix gegen Fremdspraken, ik sülvst snack sess Spraken. 84.129.227.225 15:09, 26. Jan 2006 (UTC)

Ik verstah nich, worüm jümmer glieks so'ne „Weltuntergangsstimmung“ herrscht. Heff ik seggt, dien Platt is nich wetenschoplich noog? Nee. Ik hebb blot seggt, dat de Regel gellen schall „een Artikel för een Taxon“ (Ik kann Taxon nich ümschrieven ahn dat noch kumplezeerter to maken, dat is nu mal so en Fachbegreep ahn den dat nich geiht) un ik wull blot fragen, wat dat passende Taxon hier is. Vun latiensche Brocken hebb ik nix seggt, blot dat de wetenschopliche Naam nöömt warrn schall (is dat al toveel?). Worüm sünd denn de Plattsnackers all sone mimosenhaften Wesen?

Du willst doch nich de Taxonomie Pseudowetenschop nömen? --::Slomox:: >< 16:03, 26. Jan 2006 (UTC)

Taxonomie

Tja, tja, nu is't doch geböhrt! Ik hebb en Taxobox toföögt. Bavenhen hebb ik eenfach mol ganz driest de Naams ut dat Hoochdüütsche översett. Is man bloß en Vörslag, wen dat beter kann, de schall dat man maken. Man ik meen, wi mütt düssen Artikel nu ut'nanner plünnen: Een unner dat Lemma Immen (Pl.). Dor schall düsse Taxobox bi stahn blieben. Un de annere unner den Naam Honnig-Imm. Dor kümmt denn de gröttste Deel vun den Text hen un en nee Taxobox.

Ik will noch even seggen, dat ik nu just KEEN Lust hebb, hier bloß Döntjes to vertellen. Dat unbannig veel Wöör, sünnerlich Fachwöör fehlen doot, dat weet wi ok. Man wi wüllt eenfach nich Bott geven un schrieven, wat an un for sik gor nich mööglich is: En Enzyklopädie up Platt. Un dor höört nu ok allerhand Systematik to. Wat mutt, dat mutt!--Bolingbroke 15:28, 22. Okt 2008 (CEST)

Dat Problem mit de fachlichen Naams un Systematiken vun Planten un Deerten is mi ok al faken över'n Weg lopen. Un ik mutt seggen, ik heff mi dor noch nich rantroet, vun wegen dat dat so bannig kumplex is un dat even vele Wöör nich gifft. Aver Recht hest Du: över kort oder lang mutt dat. Man, dat gifft noch en groot Problem. Dat hett mien Broder mi vertellt, de sülvst Biologie studeert hett: De Lüdd, de sik mit de Taxonomie rümslaaht sünd sik man sülvst nich jümmer gröön, mit dat, wat se indeelt un toordent... Dat wull ik blots blangento anmarken. --Iwoelbern 15:41, 22. Okt 2008 (CEST)