Corinna Halke-Teichmann
Corinna Halke-Teichmann (* 9. Juli 1957 in Düörpm) is en ehmalge düütsch Ieskunstlöperin un nu Sportjournalistin.
Mit hör Partner Eberhard Rausch kunn se in’ Paarloop, dormals noch ünner hör Naam Corinna Halke, van 1974 bit 1976 jewiels de Düütsch Meesterschap up hör Naam schrieven. Fievmal hett se an Ieskunstloop-Weltmeesterschapen und fievmal an Ieskunstloop-Europameesterschapen deelnommen, ahn dat dat to en Medaille recken dee. Ok bi de Olympisch Winterspelen 1972 (Platz 10) un 1976 (Platz 8) reck dat nich för en Platz up dat Podium.
Nah hör Karriere wurr se 1981 Sportjournalistin un arbeit siet 1984 för den Bayerischen Rundfunk un för de ARD. Se modereert ünner annern tietwies den Sportblock in de Abendschau vun dat Bayerisch Feernsehn un is aktuell as Reporterin un Moderatorin för Blickpunkt Sport in’ Insatz.
Halke is verheiraadt un hett een Kind.