Clifford Glenwood Shull

Clifford Shull (rechts) mit Kollege Ernest Omar Wollan (1949)

Clifford Glenwood Shull (* 23. September 1915 in Pittsburgh, Pennsylvania; † 31. März 2001 in Medford, Massachusetts) weer en US-amerikaansch Physiker. Hüm wurr 1994 de Nobelpries för Physik tospraaken.

Leven

Clifford Shull wurr an’n 23. September 1915 in Pittsburgh in den Stadtdeel Glenwood as dart Kind vun David H. Shull († 1934) un sien Ehefru Daisy B. Shull boren, hett en ölleren Bröer (Perry Leo) un en öllere Süster (Evalyn May). He hett van 1933 bit 1937 Physik an dat Carnegie Institute of Technology in Pittsburgh studeert un 1941 sien Doktertitel an de New York University kreegen. Shull funn en Anstellung an n Forschungslaboratorium vun The Texas Company (Texaco) in Beacon, New York. Nah den Tweeten Weltkrieg gung he 1946 an dat Clinton Laboratory hüüd Oak Ridge National Laboratory) in Tennessee. 1955 hett he en Roop as Perfesser an dat Massachusetts Institute of Technology (MIT) annommen, wo he bit to sien Ruhestand 1986 forschen un lehren dee.

Clifford Shull hett 1941 Martha-Nuel Summer heiraadt un hett dree Söhns, John, Robert un William. He is an’n 31. März 2001 in dat Lawrence Memorial Hospital in Medford, Massachusetts, storven.

Wark

De Upgaav vun Shull bi The Texas Company weer de Analyse vun de Mikrostruktur vun Katalysatoren för de petrochemische Industrie mittels Röntgenstreuung un Elektronenstreuung. Nah sien Wessel an dat Oak Ridge National Laboratory hett he mit Ernest Walton (1903–1995) an de Entwicklung vun de Neutronenstreuung an Fastkörpern arbeit, de se in de folgend Johren perfektschoneert hemm.

In de 1970er Johren hett he an Experimenten to de Neutronen-Interferometrie arbeit (as tovör all Sam Werner an de University of Missouri ud Helmut Rauch un Anton Zeilinger in Wien). Insbesondere wull he dormit Gravitationseffekte nahwiesen. In sien Grupp weern dormals Daniel Mordechai Greenberger un Michael Horne, de för hör Arbeiten to de Grundlagen vun den Quantenmechanik bekannt sünd.

Clifford Shull wurr 1994 tosommen mit Bertram Neville Brockhouse mit den Nobelpries för Physik „für ihre Entwicklung von Techniken zur Streuung der ungeladenen Kernteilchen“ uttekent.

Utteknungen

• 1956 Buckley Prize, American Physical Society
• 1957 Wahl in de American Academy of Arts and Sciences
• 1960 Naamgever för de Shull Rocks in der Antarktis
• 1975 Wahl in de National Academy of Sciences
• 1993 Gregori-Aminoff-Pries vun de Königlich Sweedsch Akademie vun de Wetenschapen]]
• 1994 Nobelpries för Physik

Schriften

• Clifford Shull: Early development of neutron scattering. In: Reviews of Modern Physics. Band 67, 1995, S. 753–757

Literatur

• Clifford G. Shull, in: Internationales Biographisches Archiv 27/2001 van’n 25. Juni 2001, in dat Munzinger-Archiv (Artikelanfang free afroopbar)

Weblinks

Clifford Glenwood Shull. Mehr Biller, Videos oder Audiodateien to’t Thema gifft dat bi Wikimedia Commons.

• Indrag up de Sieiden vun den Nobelpreis (engelsch)
• Nahroop vun dat MIT