Christian Daniel von Finckh

Vun Wikipedia
Graff von Christian Daniel von Finckh op’n Gertrudenkarkhoff in Ollnborg

Christian Daniel von Finckh (* 9. September 1766 in Zeven; † 10. April 1813 in Bremen) weer en düütschen Verwaltungsbeamten.

Von Finckh is 1766 as Söhn von Lucie Christine, borene Schnedermann (* 1735), un den Pastoor Georg Clemens von Finckh (1726–1802) in Zeven boren un hett to de Eddelfamilie von Finckh tohöört. He hett Juristeree an de Universitäten Göttingen un Rostock (inschreven an’n 17. Oktober 1785[1]) studeert. Na dat Studium weer he Avkaat un Prokurater in Stood un is dor ok Stadtsyndikus ween. Von 1799 bet 1806 weer he Bövervaagd von dat Gericht Land Wusten un is denn in’n ollnbörgschen Verwaltungsdeenst wesselt. He is 1808 Landvaagd in Övelgünn worrn. As Ollnborg 1810 Deel von dat Königriek Westfalen un denn von dat Kaiserriek Frankriek worrn is, is von Finckh in dat Departement von de Wersermünnen as Tribunalrichter för dat Arrondissement Ollnborg insett worrn.

Nadem General Friedrich Karl von Tettenborn Anfang 1813 mit russ’sche Truppen op Hamborg vörrückt is, hett dat in’n ganzen Noordwesten von Düütschland Opstänn un Unruhen gegen de franzööschen Besatters geven. An’n 17. März ok in Ollnborg. An’n 19. März is de franzöösche Ünnerpräfekt Pierre-Emmanuel Frochot ut Ollnborg weg un hett en Kummission von fiev inheemsche Beamte de provisorische Regerung överlaten. Dor hebbt ünner annern von Finckh un Albrecht Ludwig von Berger tohöört. Se hebbt en Proklamatschoon rutgeven, üm bi dat Volk för Roh to sorgen. Kort later sünd de Franzosen aver wedder trüggkamen. Mit de Proklamatschoon weren se nich inverstahn, von wegen, dat de ok as Oproop to’n Wedderstand verstahn warrn kunn. De Liddmaten von de Kummission sünd an’n 4. April in Haft nahmen worrn un kemen op Order von General Vandamme an’n 9. April vör en Kriegsgericht in Bremen. Von Finckh un von Berger sünd to’n Dood veroordeelt un an’n 10. April 1813 exkuteert worrn, de annern dree hebbt Haftstrafen kregen.

Von Finckh un von Berger sünd vör dat Dovendoor begraven worrn. Nadem de Franzosen verdreven un Hertog Peter I. von Ollnborg trüggkehrt weer, sünd se an’n 20. April 1814 rehabiliteert worrn. De Groothertog hett de beiden op’n Gertrudenkarkhoff ümbedden un dor en Ehrenmaal boon laten, dat dicht bi dat Mausoleum von de Hertöög liggt. 1823 hett de Groothertog von Ollnborg en Denkmaal för de beiden opstellen laten.

Von Finckh hett 1800 in Hamborg Friederike Elisabeth Süllow (16. August 1778-28. März 1815; Dochter von Johann Conrad Süllow) freet. De beiden harrn de Kinner Ernst (1803–1889), Alexander (1806–1888) un Johann (1807–1867).

Ehren[ännern | Bornkood ännern]

In Gedenken an von Finckh un von Berger hebbt in Ollnborg twee parallele Straten twüschen Alexanderstraat un Friedrich-Augut-Platz de Naams Von-Finckh-Straat un Von-Berger-Straat kregen.

Literatur[ännern | Bornkood ännern]

  • Gildemeister: Finckhs und Bergers Ermordung. Bremen 1814
  • ahn Verfater:Andenken an die Canzleyräthe Christian Daniel von Finckh und Albrecht Ludwig von Berger in kurzer Darstellung der französischen Gewaltherrschaft im Herzogthum Oldenburg. Bremen 1825

Footnoten[ännern | Bornkood ännern]

  1. Immatrikulatschoon von Christian Daniel von Finckh in dat Rostocker Matrikelportal