Charon (Mythologie)
Charon (greek. Χάρων: „wrantigen Witten“, etruskisch Charun) weer in de Greeksche Mythologie de düstere ole Fährschipper, de de Doden för een Obolus öber den Stroom Acheron (oder Styx) nah dat Riek vun de Doden röberföhrt hett.
Herkamen
[ännern | Bornkood ännern]
Charon weer de Söhn vun Nyx (Nacht) un Erebos. Sien Geswister sünd Ker, Moros, Hypnos, Aither, Hemera, Thanatos, Hesperiden, Momos, Eris, Moiren, Nemesis.
Upgaav
[ännern | Bornkood ännern]Charon bröch de Doden öber den Stroom Acheron nah den Ingang vun de Hades. Man he leet sik nich rümkriegen un nich besnacken: Up sien Fähr nehm he bloß de Doden mit, de een richtig Gräffnis kregen harrn un ünner de ehr Tung een Münt as Obolus legen harr. De Doden, de keen Gräffnis kregen harrn un de nich up Charon sien Schipp dröffen, de mössen hunnert Johre an den Acheron töben un an sien Över as Schaddens rümbiestern.
Utsehn
[ännern | Bornkood ännern]
De Greken dachen sik Charon as een düüstern un gnadderigen Olen. He harr düüster Schippertüüch an, as dat faken up attisch Vasen to sehn is. De Etrusker hefft em sik anners vörstellt: Se dachen, Charon weer een Wörger, de gräsig un meist as een half Deer utsehn dö. Mit een Hammer in de Hand mook he mol Lüde doot in de Slacht un mol bröch he de Doden in de Ünnerwelt oder pass dor an de Porten up.
Amenn steiht he dor as Bild för de Ünnerwelt un för den Dood. So leevt he hüdigendags noch bi de Greken as Charos oder Charontas, de gnadderige Ool, de mol as een swarten Vagel up sien Opper dalstörten deit, mol as een fleten Riedersmann de Doden ehr Mass dor de Luft nah dat Dodenriek henstüürt.
Literatur
[ännern | Bornkood ännern]To’n eersten Mol warrt vun Charon wat schreben in dat Gedicht Minyen, dat bi Pausanias nömmt warrt. In Vergil sien Aeneis warrt ok vun em snackt, just so, as later bi Dante Alighieri in sien Göttlich Kummedi, wo he denn in de Christlich Mythologie inföhrt warrt.
Naams vun Charon
[ännern | Bornkood ännern]Na Charon hett de Charonkrink sien Naam kregen. Dat weer een Krink vun Dichterslüde an’n Anfang vun dat 20. Johrhunnert, wo Otto zur Linde un Karl Röttger mit bi weern. Butendem hett de Maand vun den Dwargplaneten Pluto sien Naam vun Charon kregen (kiek bi: Charon).
