Carl Erxleben (Landdrost)

Carl Wilhelm Anton Erxleben (* 30. Dezember 1815 in Noordholt; † 14. Februar 1882 in Auerk) weer en hannöverschen Politiker un Verwaltungsbeamten.

Erxleben is 1815 as Söhn von Charlotte Marie Elisabeth, borene Koch (1789-17. Oktober 1854), un Julius Carl Friedrich Erxleben (28. November 1778-1846) boren. Sien Broder weer Albrecht Erxleben. Erxleben hett sik an’n 28. April 1834 an de Universität Göttingen inschreven un dor bet bet Harvst 1837 Juristeree studeert. In de Tied von sien Studium weer he Liddmaat von dat Corps Hannovera un later ok dat Corps Bremensia.

1848 is he Referent bi dat Binnenministerium von dat Königriek Hannover worrn. 1853 hett he den Rang von en Regerungsraad kregen un weer Maat von dat Kunsistorjen in Hannover. 1856 is he gehemen Regerungsraad worrn un weer denn bi de Landdrostie Auerk. Von 1858 bet 1862 weer Erxleben för de Städer Auerk un Esens Deputeerten bi de Twete Kamer von de Stännversammlung von dat Königriek Hannover. Nadem dat Königriek Hannover 1866 von Prüßen annekteert worrn is, is Erxleben as Nafolger von Carl Ferdinand Nieper kommissarsch Landdrost von de Landdrostie Auerk worrn. Dat Amt harr he aver blots bet 1867, denn hett Karl August von Guionneau dat Amt övernahmen. Erxleben weer wedder Regerungsraad un Viez von’n Landdrost.

Erxleben hett an’n 21. September 1847 in Auerk Marie Louise Henriette Steltzer (1825-3. Juli 1887) freet. De beiden harrn den Söhn Wilhelm (1864-1938; weer Generalmajor).