Bulbourethraldrüüs

Vun Wikipedia

De Bulbourethraldrüüs (Glandula bulbourethralis, Miegröhrenzibbeldrüüs) is en poorig anleggte akzessoorsche Geslechtsdrüüs bi de Heken vun de Söögdeerten. Bi’n Hund is se aver nich utbillt. In de Humanmedizin warrt se na den engelschen Anatom William Cowper (1666–1709) ok as Cowpersche Drüüs oder Cowper-Drüüs betekent.

Egenschoppen[ännern | Bornkood ännern]

De Drüü liggt in’t Diaphragma urogenitale, dat is en mit Binngeweev utfüllten Afsnitt vun’t Becken. Bi Mannslüüd is disse Drüüs ruchweg so groot as en Arf.

Bi de Deerten is de Drüüs bi’t Swien an gröttsten utbillt. Dor hett se de Form vun en Zigarr un is bi’n utwossen Ever meist 20 cm lang. Se lett sik bi disse Deeroort rektal föhlen un kann ok as Teken bi’t Opdecken vun Kryptorchiden nütt warrn, vunwegen dat se bi kastreerte Deerten dör den Mangel an Testosteron verkümmert oder sik gor nich entwickelt.

Bi Mannschlüüd is de Utföhrgang ruchweg 5 cm lang un münnt in de Miegröhr. Bi Poorhovers münnt he in en dorsal utrichten Blindsack (Recessus urethralis).

Funkschoon[ännern | Bornkood ännern]

Dat Sekret vun de Bulbourethraldrüüs, dat as Vörejakulat oder Lustdrapen betekent warrt, warrt tomeist vör de egentlichen Ejakulatschoon afgeven. Dat Sekret is sliemig un hett vör allen de Opgaav, Resten vun’n Urin un ’n beten ok dat sure Ümfeld vun de Scheed to neutraliseeren. Bi’t Verlaten vun’n Pint kann dat Sekret al Saatzellen bargen un dordör mööglicherwies en Swangerschop utlösen. Disse Spermien kamt aver nich ut de Bulbourethraldrüüs, man sünd villicht Resten vun en fröhere Ejakulatschoon, de noch in de Miegröhr weern, oder se sünd al dör de Prostata dörwannert, to’n Bispeel dör de Ejakulatschoonsphaas vun de Emisschoon ahn Ejakulatschoon dorna.

Krankheiten[ännern | Bornkood ännern]

De Bulbourethraldrüüs speelt ok klinisch en Rull, vunwegen dat bi’n Befall vun de achteren Miegröhr dör Neisseria gonorrhoeae (Urethritis gonorrhoica posterior) – de Krankmakers vun’n Drüpper (Gonorrhoe) – Abszessen (Cowper-Abszess) un Strikturen vun de Miegröhr (Cowper-Striktur) utlööst warrn künnt.[1] Ok nich-gonorrhoische Sweren vun de Miegröhr, de vun Mykoplasmen, Chlamydien oder Pilzen utlööst warrt, künnt op de Bulbourethraldrüüs övergriepen.[2]

Kiek ok[ännern | Bornkood ännern]

Literatur[ännern | Bornkood ännern]

  • Uwe Gille: Männliche Geschlechtsorgane. In: F.-V. Salomon u. a. (Rgv.): Anatomie für die Tiermedizin. Enke, Stuttgart 2004, ISBN 3-8304-1007-7, S. 389–403.

Weblenken[ännern | Bornkood ännern]

Borns[ännern | Bornkood ännern]

  1. Otto Braun-Falco, Helmut Heinrich Wolff: Dermatologie und Venerologie. Utgaav 5, Springer, Berlin/ Heidelbarg 2005, ISBN 9783540405252, S. 216.
  2. Wolfgang Gerok: Die Innere Medizin: Referenzwerk für den Facharzt. Utgaav 11, Schattauer, Stuttgart/ New York 2007, ISBN 9783794522224, S. 791.