Bruno Duge

Vun Wikipedia

Bruno Duge (* 12. Oktober 1884 in Willemshoben; † 3. Februar 1970 in Cuxhoben) weer en düütschen Politiker.

Duge is 1884 as Söhn von Caroline Sophie Adelheid, borene Ahrens, un den Loots Friedrich Wilhelm Johann Duge in Willemshoben boren.[1] Na de School in Geestmünn un dat Abitur 1904 an dat Realgymnasium Vesack hett Duge 1904 anfungen, Juristeree an de Universität Kiel to studeren.[1] He hett dat Studium denn aver afbraken un lever Medizin an de Universitäten Heidelberg, Berlin, Rostock (inschreven an’n 5. Mai 1909; bet 29. Oktober 1910[2]) un Bonn studeert.[1] 1912 is he Assistent bi Max Nonne an dat Krankenhuus Eppendörp worrn un hett dor ok sien Dr. med. maakt.[1]

An’n 2. Januar 1914 hett Duge sik as Dokter in Cuxhoben dallaten.[1] Sien Vader is dor 1907 Fischereeinspekter worrn.[1] In’n Eersten Weltkrieg weer he von’n 1. August 1914 bet 18. Juni 1919 Soldaat un Militärdokter bi dat 76. Infanterie-Regiment.[1][3] 1919/1920 is he dat eerste Maal Maat von de Börgervertredung von de Stadt Cuxhoben worrn.[1] Duge weer 1945 Mitgrünner von de Cuxhobener FDP un von’n 27. November 1952 bet 31. Oktober 1966 Maat von’n Stadtraad.[1] 1966 is he dor ut Öllersgrünn rutgahn. He weer Vörsitter von’n Sozialutschuss un Maat von’n Finanz- un Kulturutschuss.

Nadem Böverbörgermeester Heinz Wachtendorf an’n 5. Juni 1956 as Böverstadtdirekter wählt worrn is, is Duge sien Nafolger as Böverbörgermeester worrn. Bi de Kommunalwahlen in Neddersassen 1956 is de SPD denn aver stärkste Partei worrn un Karl Olfers hett Duge to’n 27. November 1956 aflööst. Duge is denn an’n 18. April 1961 Börgermeester un Olfers sien Vertreder worrn.[1] Dat Amt harr he bet to’n 29. Oktober 1964.[1]

An’n 4. Februar 1964 hett he dat Verdeenstkrüüz von’n Neddersassischen Verdeenstorden kregen.[1]

Warken[ännern | Bornkood ännern]

  • Ein Beitrag zur Kenntnis der Psychosen bei der multiplen Sklerose des Gehirns und Rückenmarks. Dokterarbeid, Berlin 1914

Footnoten[ännern | Bornkood ännern]

  1. a b c d e f g h i j k l Ein verdienter Kommunalpolitiker, Cuxhaven Kurier von’n 6. März 2013
  2. http://matrikel.uni-rostock.de/id/200009948
  3. Marie-Luise Recker: »Einmal muss doch das wirkliche Leben wieder kommen!«: die Kriegsbriefe von Anna und Lorenz Treplin 1914-1918. Schöningh, 2010, Sied 694