Mark-Brannenborger Platt

Dat Mark-Brannenborger Platt is en ostnederdüütschen Dialekt von de plattdüütsche Spraak, de vör allen in Brannenborg un Sassen-Anhalt spraken warrt oder spraken worrn is.

Rebeed

De Noordgrenz to dat Mekelborgsche is groff de Landsgrenz to Mekelborg-Vörpommern bet an de Elv. Op de linke Sied von de Elv höört de Ollmark to dat Märksche. Wieder in’n Süden in Sassen-Anhalt höört dat rechte Över von de Elv to’n gröttsten Deel to dat Märksche. De Süüdgrenz is de sülve as de Süüdgrenz von dat Plattdüütsche. En genaue Grenz lett sik nich mehr angeven, denn al sied Johrhunnerten wiekt dat Plattdüütsche vör dat Hoochdüütsche trüch un hüüd is dat so, dat meist överall, wo Märksch spraken warrt, dat blot noch wenig Lüüd sünd. In’n Noorden mehr un in’n Süden meist gorkeen mehr. In grote Delen vun Brannenborg is de ole plattdüütsche Dialekt dör dat Hoochdüütsch-Brannenborgsche verdrängt, en hoochdüütschen Dialekt, de op de Ümgangsspraak vun Berlin opsett. De Ostgrenz is de Staatsgrenz to Polen. Vör 1945, as de Düütschen ut de poolsch besett Rebeden verdreven worrn sünd, hebbt se ok op de rechte Sied von de Oder, in de Neemark Märksch spraken.

Ünnerafdelen

Dat märksche Platt lett sik groff indelen in Noordmärksch un Middelmärksch. Dat Süüdmärksche hett al allerhand Kennteken von dat Hoochdüütsche un lett sik in’n strikten Sinn nich mehr to dat Plattdüütsche tellen. To’n Bispeel heet dat dor al machen un nich mehr maken. De wichtigste Ünnerscheed twischen de dree Delen liggt in de Vokaals o un e so as in Koken un leef. Dat Noordmärksche hett Koken un leef, dat Middelmärksche Kueken un lief un dat Süüdmärksche hett jüst as dat Hoochdüütsche Kuchen un lieb. Dat Middel- un Süüdmärksche tekent sik ok dör en groten nedderlandschen Influss ut.

Grammatik

Substantiv

Fall	Eentall			Mehrtall
	He	Se	Et	He	Se	Et
Nominativ	de Mann	de Fru/Fruu/Fro	dät/det Hus/Huus	de Männer Mannslüüd	de Fruuen/Fruu'n Froonslüüd/Fron'slü	de Hüser
Objektiv	den/dänn Mann	de Fru/Fruu/Fro	dät/det Hus/Huus	de Männer Mannslüüd	de Fruuen/Fruu'n Froonslüüd/Fron'slü	de Hüser

Weblenken

• Websteed mit Spraakbispelen (hoochdüütsch)