Boris Borissowitsch Jegorow

Boris Borissowitsch Jegorow (russisch Борис Борисович Егоров; * 26. November 1937 in Moskau; † 12. September 1994 ok dor) weer en sowjetsch Kosmonaut un Dokter.

Boris Jegorow, de ut en medizinisch präägt Öllernhuus stamm (sien Vader weer Hartchirurg, sien Moder Oogendokter), fung en Medizinstudium an, dat he 1961 an dat 1. Moskauer Medizinisch Institut afslooten hett. Wiels dit Studium hett he Juri Gagarin kennen lehrt. Af de Tiet hett he sück för de Ruumfohrtmedizin begeistert. 1961 hett he sück an de Humboldt-Universität in Berlin bewurben. He spezialiseer sück up Gliekgewichtssysteme.

Nahdem de Mediziner an' 26. Mai 1964 as Kosmonaut utwählt wurrn weer, is Boris Jegorow all an' 12. Oktober 1964 mit dat nee dreesittig Ruumschipp Woschod 1 (gemeensam mit Wladimir Komarow un Konstantin Feoktistow) as Forschungskosmonaut mit medizinischen Swoorpunkt Weltruum flagen; he weer de eerste Mediziner in't All. To'n Tietpunkt vun sien Ruumfloog weer Jegorow eerst 26 Johr olt, nah German Titow un Walentina Tereschkowa is he de dartjüngste Ruumfohrer vun all Tieden.

Noch in dat sülvig Johr is Jegorow aber weer ut dat Kosmonautenkorps utscheeden. Disse ok för sowjeetsch Verhältnisse bannig kört Sett is immer noch Grund för dat Vermooden, dat de Upnahm in dat sowjeetsch Kosmonautenprogramm dör sien Vader, dormals Liddmaat vun dat Politbüro vun dat ZK vun de KPdSU, eerst mögelk maakt wurrn weer.

Jegorow up en sowjeetsch Breefmark (1964)

1965 wurr de ehmalge Kosmonaut as Kandidat vun de medizinischen Wetenschapen upnommen. Dit Studium hett Jegorow 1976 mit den Doktertitel vun de medizinisch Wetenschapen afslooten; af 1984 weer he Perfesser.

1967 hett Jegorow en Stäe as Laborleiter in dat Institut för medizinisch-biologische Fraagstellungen (Institut Mediko-Biologitscheskich Problem) antreeden. Van 1984 bit 1989 weeer de Mediziner Baas vun dat Biomedizinisch-Technologisch Institut in dat Ministerium för Gesundheitswesen vun de UdSSR. 1989 is Boris Jegorow ut den aktiven Militärdeenst un den medizinischen Deenst utscheeden.

Jegorow weer dreemal verheiraadt un harr dree Kinner. He is 1994 an de Folgen vun en Hartinfarkt storven.

Sonstiges

Nah hüm is de Asteroid (8450) Jegorow nömmt wurrn.

Literatur

• Peter Stache, Raumfahrer von A bis Z, Militärverlag der Deutschen Demokratischen Republik, Berlin [Ost] , 1988, ISBN 3-327-00527-3

Weblenken

• spacefacts.de: Kurzbiografie