Bong
Dit Woort hett noch annere Bedüden: kiek dorför ünner Bong (Liberia).
De oder dat Bong is en besunner Aart vun Waterpiep. Dor warrt tomeist Cannabis in smöökt, man ok Mengels ut Cannabis un Tabak, hen un wenn ok anner Drogen, as Salva Divinorum oder normalen Tobak.
Bongs warrt af un to süms boot ut Buddels, man dat is an un for sik nich nödig, weil se in jeden Head Shop to kopen sünd. Bongs sund traditschonele Smöök-Appraten ut Asien. Se kaamt vun Thailand un Indonesien her, man dat gifft ok Bongs in Neeguinea un up de Philippinen. Dor weert se na de Traditschoon ut Bambus anfardigt.
Wie en Bong upboot is
[ännern | Bornkood ännern]En Bong is en länglichen Zylinder ut Glas oder Metall oder Acryl, de na baben hen open is. Dor weert denn en paar Zentimeters Water rinfüllt. Nich wiet baben den Waterspegel sünd tomeist twee Löcker. In dat eene Lock warrt dat „Chillum“ rinsteken, dat anner is dat „Kicklock“ (oder ok „Flashlock“). Dat „Chillum“ is en Rohr, dat na baben hen en Kopp hett (ok „Head“ oder „Hoot“), just as en Piepenkopp. In düssen Kopp warrt dat Rökeltüüchs rinstoppt (faken „Mengels“ nömmt oder „Mix“, „Moos“, „Maische“, „Majé“ oder „Mélange“). Düt Chillum warrt in dat Lock rinsteken, wat dor just för dor is, so, dat sien ünner Enn ünner Water is. De Kopp is nu buten de Bong. Midderwielen gifft dat ok Bongs mit en Zentrifuug. Dor schöllt de Schaadstoffen as Teer to’n groden Deel ut den Damp mit rutfiltert weern, warrt seggt.
Smöken
[ännern | Bornkood ännern]
Dat Smöken geiht in twee Afsneden vör sik. Toeerst warrt suugt. Dor mutt dat Kicklock bi mit’e Fingers tostoppt weern (natüürlich nich bi Bongs sunner Kicklock). De Mund sett an dat böverst Enn vun den Zylinder an. De Kopp warrt ansteken un denn warrt duchtig un lang tagen. Vunwegen den Unnerdruck in den Bong ströömt de Luft ut dat eenzig Lock, wat noch open is vun dat Chillum her nah. Dorbi warrt de glönige Kopp vunwegen de Luft, de dor dörströömt, noch heter. De Damp warrt dör dat Water in den Zylinder tagen. Dor kümmt dat Blubbern vun her, dat en Bong utmaken deit, wenn smöökt warrt. Dor hett de Bong ok den Ökelnaam „Blubber“ vun her. Wenn de Zylinder ganz vull is mit Damp, denn geiht dat fudder. Eenmol warrt noch deep inademt (dör de Nese oder en mutt afsetten) un denn suugt een so duchtig an de Bong bit de lüttje Kopp leddig is. Denn warrt dat Kicklock open maakt (bi Bongs sunner Kicklock warrt de Kopp hoochböört) un de ganze Damp warrt in de Lung tagen. Een kann den Kopp ok up eenmol smöken, sunner af to setten. Dat warrt denn „hitten“ nömmt (vun engelsch „hit“ – slahn) oder ok „dörscheten“.
Anner Bongs
[ännern | Bornkood ännern]Holland-Bong
[ännern | Bornkood ännern]En Holland-Bong is en eenfach Bong ut Glas. De sütt en beten so ut, as en Blomenvaas, besunners, wenn de ok noch ut Buntglas maakt wurrn is. Unnen is de Bong rund un bi 15 cm groot. Bit to twee Drüddels vun de Hööchd hen is de Bong butenrüm bloß noch half so groot. Nah dat Mundstück hen warrt se denn wedder en beten breder. Düsse Bongs sünd ganz eenfach un billig. Dat Chillum is faken vun en Stück Aquariumslauch maakt, wo baben en lüttjen Holtkopp upsteckt is. En egen Kicklock gifft dat dor normalerwies nich.