Bernd Lütjen

Bernd Lütjen (* 22. Dezember 1963 in Oosterholt-Scharmbeek) is en düütschen Politiker von de SPD.

Lütjen is 1963 in Oosterholt-Scharmbeek boren un weer von 1970 bet 1973 an de Grundschool Wallhöben. Von 1973 bet 1975 weer he op de Orientierungsstufe Hambargen un von 1975 bet 1982 op dat Gymnasium Oosterholt-Scharmbeek. Na sien Abitur hett he von 1982 bet 1985 en Lehr as Kreisinspekter-Anwärter bi’n Landkreis Oosterholt maakt. Blangenbi hett he an de Fachhoochschool för Verwaltung un Rechtspleeg in Ollnborg studeert un hett dat as Diplom-Verwaltungswirt afslaten. Lütjen hett von 1985 bet 2001 op verscheden Posten för den Landkreis Oosterholt arbeidt.

Lütjen is siet 1990 verheiraadt. He hett dree Kinner, een Söhn un twee Döchter.

Lütjen is 1982 in de SPD ringahn. Von 1996 bet 2001 weer he Vörsitter von’n SPD-Distriktverband Scharmbeekstotel. Von 1996 bet 2001 weer he in’n Stadtraad von Oosterholt-Scharmbeek un weer von 2000 bet 2001 Bisitter in’n SPD-Oortsvereensvörstand Oosterholt-Scharmbeek. 2001 is he as Börgermeester von de Samtgemeen Hambargen wählt worrn un 2006 hebbt se em noch en tweet Maal wedder wählt. In’n September 2013 is he as Landraad von’n Landkreis Oosterholt wählt worrn, nadem sien Vörgänger Jörg Mielke na de Neddersassische Staatskanzlie wesselt is un dat Amt vör de Tied opgeven hett.

Weblenken

• Lütjen sien Websteed (hoochdüütsch)