Benno Eide Siebs

Vun Wikipedia

Benno Eide Siebs (* 14. September 1891 in Geestmünn; † 25. Januar 1977 in Bremerhoben) weer en düütschen Jurist, Beamten un Heimatforscher.

Siebs is 1891 as Söhn von’n Reeder August Siebs in Geestmünn boren. He weer op dat Gymnasium in Bremerhoben un hett von 1910 af an Rechts- un Staatswetenschoppen an de Universität Heidelberg, de Universität München, de Universität Griepswoold und de Universität Rostock studeert. 1910 is he ok Maat von de Burschenschaft Vineta Heidelberg worrn.[1] He hett 1914 in Rostock sien Dokter maakt.

Eide Siebs hett denn an verscheden Öörd in de prüüßsche allgemene Staatsverwaltung in’n Verwaltungs- un Justizdeenst as Dezernent, Referent un Afteilungsbaas arbeidt. He weer von 1928 bet 1932 Landraad von’n Kreis Weener in Oostfreesland un von 1932 bet 1933 von’n Landkreis Land Hadeln. He keem denn 1933 na Königsbarg un 1939 as Regerungsraad na Meideborg. 1945 keem he trügg na de Ünnerwerser un hett denn Geestmünn wahnt. He weer bet to siene Pensionerung 1954 Richter an dat Amtsgericht Wersermünn/Bremerhoben un weer en Tied lang Baas von dat Amtsgericht Dorum.

Siebs weer von 1928 bet 1932 för Oostfreesland in’n Fresenraad un weer von 1931 af an wählt Maat von de Histoorsche Kommission för Neddersassen. He hett en Reeg heimatkundliche Schriften schreven un weer von 1952 bet 1969 Vörsitter (von 1969 af an Ehrenvörsitter) von’n Heimatbund Männer vom Morgenstern. He weer Vörsitter von’n Maschenraad, de de Forschung in’t Küstenrebeed an de Noordsee fördern schull un de mit de Neddersassische Landsstell för Maschen- un Wortenforschung tohooparbeiden dee. En grote Tall Biografien entstünn ünner sien Fedder in de Johren 1950 un 1960.

1965 hett he för sien Arbeiden to de Wortfresen un anner histoorsche Themen in de Region den Hermann-Allmers-Pries kregen.

Eide Siebs liggt in dat Familiengraff Eide Siebs op’n Wulsdörper Karkhoff in Bremerhoben.

Warken[ännern | Bornkood ännern]

  • Wappenbuch der Marschlandschaften Osterstade, Land Wührden, Lunemarsch und Vieland. Borghardt, Bremervöör 1923
  • Die Weihnachtsflut von 1717 zwischen Unterweser und Unterelbe, 1925
  • Die Wangerooger. Eine Volkskunde. Littmann, Ollnborg 1928
  • Am grauen Strand...- Erkundetes und Erlebtes aus Alt-Bremerhaven. Verlag Ditzen, Bremerhoben 1953
  • mit Erich Wohlenberg: Helgoland und die Helgoländer, Kiel 1953
  • Land meiner Jugend- Fahrten und Begegnungen an Niederweser und Niederelbe. Verlag Ditzen, Bremerhoben 1955
  • 125 Jahre Rickmers. Ein Buch von Schiffbau und Schiffahrt. Sülvsverlag Rickmers, Hamborg un Bremerhoben 1959
  • Sagenbuch des Landes Wursten. Veröffentlichung der Männer vom Morgenstern, Verlag Ditzen, Bremerhoben 1969

Literatur[ännern | Bornkood ännern]

  • Festschrift zum 70. Geburtstag und Nachruf auf Benno Eide Siebs. In: Jahrbuch der Männer vom Morgenstern. Band 42/1961, S. 10 ff und Band 56/1977, S. 351 f.

Footnoten[ännern | Bornkood ännern]

  1. Helge Dvorak: Biographisches Lexikon der Deutschen Burschenschaft. Band I Politiker, Teilband 5: R–S. Heidelberg 2002, S. 430.