Benazir Bhutto

Vun Wikipedia
Benazir Bhutto fotografeert vun Oliver Mark, Dubai 2006

Benazir Bhutto (* 21. Juni 1953 in Karatschi; † 27. Dezember 2007 in Rawalpindi) weer ene pakistaansche Politikerin vun de Volkspartei vun Pakistan. Bhutto is vun 1988 bet 1990 Ministerpräsidentin vun Pakistan wesen un denn noch wedder vun 1993 bet 1996.

Bhutto is 1953 in Karatschi as Dochter vun Zulfikar Ali Bhutto boren, de later Präsident un Ministerpräsident vun Pakistan wesen is. Se güng in’n Lady-Jennings-Kinnergoorn un weer denn op dat Jesus-un-Marien-Konvent in Karatschi to School. Twee Johr weer se op dat Konvent vun’n Präsentatschoonsorden in Rawalpindi un denn op dat Jesus-un-Marien-Konvent in Murree. Mit 15 hett se ehren O-Level kregen un denn an de Grammatikschool Karatschi ehren A-Level maakt. Denn güng se in de USA to studeren. Vun 1969 bet 1973 op dat Radcliffe-Kolleg un denn an de Harvard-Universität, wo se en Afsluss in verglieken Politikwetenschop maakt hett. Vun 1973 bet 1979 hett se in Oxford Philosophie, Politik un Weertschop studeert. 1971 hett se in New York as Assistentin vun ehr Vadder arbeidt, as de to de Tiet vun’n Sezessionskrieg mit Oostpakistan (Bangladesch) Butenminister vun Westpakistan wesen is un bi de Vereenten Natschonen verhannelt hett.

As se ehr Studium in Oxford trech harr, güng Bhutto na Pakistan trüch. Ehr Vadder is 1977 dör en Putsch afsett worrn, keem in Haft un is 1979 ophängt worrn. Benazir Bhutto keem ünner Huusarrest un dröff eerst 1984 Pakistan verlaten un güng na Grootbritannien. Ut dat Exil hett se dat Leid vun ehr Vadder sien Partei övernahmen. An’n 18. Dezember 1987 hett Bhutto den Ünnernehmer un Politiker Asif Ali Zardari heiraadt.

As Mohammed Zia ul-Haq 1988 doodbleven is, geev dat an’n 16. November 1988 wedder Wahlen, de Bhutto as eerste Fro in en islaamsch Land wunnen hett. An’n 2. Dezember hett se ehr Amt as Ministerpräsidentin övernahmen. De Regeren is 1990 wedder uteneenfullen, as man Bhutto Korruptschoon vörhollen harr. Bhutto hett an’n 6. August ehr Amt afgeven. Vör Gericht is se aver nich kamen. Nawaz Sharif dee Bhutto in’t Amt opfolgen. 1993 is Bhutto en tweet Maal as Ministerpräsidentin wählt worrn. Disse Regeren hett Präsident Faruk Leghari 1993 wedder wegen Korruptschoon oplööst. Ok ditmal keem dat to keen Oordeel gegen Bhutto.

Vun 1999 bet 2007 weer Bhutto in Dubai in’t Exil. An’n 18. Oktober 2007 is Bhutto ut ehr Exil wedder na Pakistan trüch un hett de Oppositschoon anföhrt. Glieks an’n 19. Oktober geev dat en Anslag op Bhutto bi den 139 Lüüd doodbleven sünd. Bhutto sülvst hett aver nix afkregen.

Bhutto hett sik denn mit Präsident Pervez Musharraf afsnackt, dat se Ministerpräsidentin warrn dröff, wenn Musharraf Präsident blieven dröff. As Musharraf aver den 3. November den Utnahmtostand utropen hett, hett Bhutto dat aflehnt un meen dat güng gegen dat, wat se afsnackt harrn. Se dee to Protestakschonen opropen. Dorför hebbt se ehr den 9. November ünner Huusarrest stellt. An’n 27. Dezember 2007 hett dat noch wedder en Anslag op Bhutto geven. En Mann hett op ehr schaten un denn en Bomb hoochgahn laten. Bhutto keem noch in’t Krankenhuus vun Rawalpindi, is dor aver veerdel na Söss Oortstiet vun de Schüss doodbleven, de se drapen harrn. In ganz Pakistan keem dat to Protestakschonen.