Barnsdorp

Vun Wikipedia
Zur Navigation springen Zur Suche springen

Barnsdorp (hochdüütsch: Barnstorf) is en lütjet, awer jeschichtlich bedütsamet Nest in’ Landkreise Wulfenbüttel in Neddersassen un jehöre tau dr Jemaine Üür un dr Samtjemaine Schöppenstidde. In düsse Gejend spräket de Lüe ostfälschet Platt. Hüte wohnt um de 320 Lüü in Barnsdorp.

Tau’n ersten mal harr en Minsche „Bernherdestorpe“ ’schreem, dat was 966 in ain' Zertefikaat und hett sauveel as „Dörp vun ain’ Bernhard“. Dat Zertefikaat sejjet, dat Otto I. den Graafen Mamaco en Gut in Barnsdorp eschenket har. Bet dahenn har et tau de Mauritzkerk in Madeborch ehöret. 1226 harrn se „Bernestorpe“ schreem.

Barnsdorp liggt bi de Soltau, ’n lütjen Beek, dä sien Naam von de Soltquellen bekoom har. Düsse Quellen worrn inn Jahre 1438 von Hertoog Hinrich ’n Öllern an Gerecke Pawel tau Bronswiek forkööpet. Un 1743 harrn se 't letzte Solt ut de Quellen ehault. Denne wart de Quellen leddig. In Barnsdorp stunn um un bi 1800 unner annern et fürstliche Vorwark un de Kerk. De Parre 'höre tau düsse Tied tau Watenstidde un sau is't ook hüte noch. 1937 hebbt de Nazis et fürstliche Vorwark oppedeelt: Den Ackere bekoom Bur'n ut annere Dörper, wo de Nazis öre grooten Projekte as de Hermann-Göring-Werke (hüte Salzgitter AG) or en Middellandkanal ebuut hebben. Dä Bu'rn, dä in de „Siedlunge“ 'n betchen butten vun Dörp öre nien Hüser ebuut hebben, mutt düsse Hüser in „germanischer Langform“ buun. De Hüser sünt ne Besönnerhait, weil se so gar nich in de Gejend passen. Sei süht eher ut as in de Lüneborjer Haide.

1974 kom de Jemainereform. Da harrn se Barnsdorp met Watzen, Warle un Üür tau ner Jemaine tausamm’ elejjet, un dä hett nu „Jemaine Üür“. En betchen später, 1991, har sik Barnsdorp en Wapen egee’m: ’ne „Strandaster“, in blu un jeel, de Farwen vun’ bronswiekschen Lanne. Un in düsse Farwen bläuet de Blaume ook upp de Soltwischen. Et Wapen is edeelt. Dat sall sejjen, dat tau de Barnsdörper Lännereien ook de Feller vun ehemalijen Dörp Bisdorp ehöret.