Angreep in en Regionalbahn bi Würzborg

Bi en Angreep in en Regionalbahn bi Würzborg an'n 18. Juli 2016 hett en minnerjöhrigen Flüchtling, de alleen in Düütschland weer, fiev Lüde mit en Biel un mit en Mest verwunnt. Veer vun jem hett dat böös drapen. De Angrieper is later vun en Spezialinsatzkummando (SIK) vun de Polizei in Bayern dootschaten wurrn. De Behörden, de sik mit düssen Fall befaten doot, meent, hier hannel sik dat um en islamistischen Anslag bi.

Wie de Angreep aflopen is

An'n 18. Juli 2016 is de Angrieper gegen Klock acht an'n Avend ut siene Pleegöllern ehr Huus in Graukönigshofen gahn. Dat is en Gemeen mit bi 2.500 Inwahners 20 km in'n Süden vun Würzborg. He hett jem seggt, he woll Rad fohren un „dat konn en beten langer duern“. Gegen Klock 9 an'n Avend is he acht Kilomter wiet weg up den Bahnhoff in Ossenfort in de Regionalbahn (RB) 58130 vun de Boreege 440 na Würzborg instegen. Düsse Bahn föhr vun Treuchtlingen na Würzborg. Dor is he toeerst mol up de Toilette gahn. Bi 15 Minuten later hett he twuschen de Statschonen Winterhausen un Würzborg Süüd Mitfahrers mit en Biel un mit en Mest angrepen. . De tostännige Upperstaatsanwalt vun de Generalstaatsanwaltschop Bamberg hett seggt, up en Handy-Nootanroop, de uptekent wurrn weer, weern de Wöer „Allahu akbar“ düütlich to hören. Nadem de Nootbremse trocken wurrn weer un de Tog bi Würzborg-Heidingsfeld stillstahn dö, is de Angrieper utstegen un weglopen. Unnerwegens hett he en Fro, de mit ehren Hund spazeern weer, mit dat Biel tweemol in't Gesicht slahn Dat Spezialinsatzkummando Noordbayern ut Nürnbarg hett sik wegen en annern Insatz tofällig in de Gegend uphollen un hett den Angrieper bi 500 Meter weg vun'n Tog upspöört. As he mit siene Wapen up Polizeibeamte losgahn is, hefft se em mit veer Schöte drapen, dormank twee, de em dootmaakt hefft.