Angel-Waterfall
De Angel-Waterfall (spaansch Salto del Angel) is en Waterfall, de in’n Süüdoosten vun Venezuela liggt. He fallt stracks 978 Meter dal mit en enkelte Stoop, wonehm he 805 Meter dalfallt, un is dormit de hööchste Waterfall op de Eer. Bi de Indianers, de in de Gegend leevt, heet he Kerekupai-Merú.
Geografie[ännern | Bornkood ännern]
De Waterfall höört to de Gran Sabana un is Deel vun’n Canaima-Natschonalpark. Sien Water fleet later in’n Rio Carrao, nadem dat vun’n Rand vun den Tafelbarg Auyan Tepui hendalstört is. Vun wegen de grote Hööch stöövt dat Water op’n Weg na ünnen uteneen, bet sik dat ünnen wedder to en Stroom sammelt. Beten later stört dat Water denn al wedder 200 Meter hendal. Sien Water kriggt de Waterfall dör de dullen Gewitters, de op dat grote Plateau vun 700 km² rünnerkaamt. Ut de Löcker, de dat Water in’n Fels rinfreten hett, 40 Meter ünner den Rand vun’t Plateau fallt dat Water in de Deep.
Opdecken[ännern | Bornkood ännern]
Ofschoonst de Spanier Ernesto Sánchez la Cruz den Waterfall al 1910 sehn harr, is he eerst an’n 16. November 1933, as de US-amerikaansche Buschpilot James Crawford Angel op de Söök na Gold em funnen harr, bekannt warrn un hett vun em ok den Naam af.
1949 kunn en Expeditschoon vun de Natschonale Geograafsche Gesellschop ut de USA denn ok de Hööch faststellen. Sietdem weer kloor, dat dat de hööchste Waterfall op de Eer is.
Tourismus[ännern | Bornkood ännern]
Hüdigendaags is de Waterfall en grote Touristenattrakschoon in Venezuela. To’n Waterfall, de merrn in’n Oorwoold liggt, kannst aver blots mit’n Fleger henkamen.
Weblenken[ännern | Bornkood ännern]
Koordinaten:05° 58′ 02″ N, 062° 31′ 48″ W.