Anders Askevold

Anders Askevold

Anders Monsen Askevold (* 25. Dezember 1834 in Askvoll; † 22. Oktober 1900 in Düsseldörp) weer en norweegsch Landschaps- un Deertenmaler vun de Düsseldörper Malerschool.

Leven

He weer de Söhn vun den Küster un Lehrer Mons Andersen Askevold un van 1847 bit 1854 Schöler vun Hans Leganger Reusch in Bergen un van 1855 bit 1858 Schöler vun Hans Fredrik Gude in Düsseldörp. Van 1861 bit 1866 sall he in Paris leevt hemm, denn bit 1880 överweegend in Bergen, wo he 1873/1874 Ole Juul Ünnerricht geven hett. 1877/78 weer he in München un bedreev Studien bi Friedrich Voltz. He hett 1862 in Bergen Katarina Maria Didrike Gran (1834–1917) heiraadt. He harr acht Kinner, vun de Ingolf (1875–1951) as Pädagoog bekannt wurr. Van 1883 bit 1900 weer Askevold Liddmaat vun den Düsseldörper Künstlervereen Malkasten.

Wark

Cowsby

Landschaft mit See, 1853

Sommerlandschaft mit Kühen, 1860

Mit Gude, Johan Fredrik Eckersberg un Morten Müller hörr he to de beleevsten Künstlern vun de Laatromantik in Norwegen. Sien Anliggen weer dat, Deerten-, Genre- un Landschapsmaleree to verbinnen. He hett dormit an de gemeensam Bemöhen vun Gude un Adolph Tidemand anknütt, de bitherigen Malereegattungen Landschap un Genre to vereenigen.

In sien Studientiet weer dat in Düsseldörp, begäng, de Realität malerisch to dramatiseeren. He wurr neben Gude vun August Cappelen, Erik Bodom un Lars Hertervig beinfloot. Ofschons he sück in Paris uphollen harr, is de Infloot vun de franzöösch Maleree up hüm nich nahwiesbor. He funn en eegen Weg tüschen Realismus un Idealismus. Bit 1880 hett Askevold vörnehmlich dat Leven up de Almen malt, as he dat in sien Kindheit in Sunnfjord sülvst beleevt harr. Hüm gung dorbi de Dorstellung vun dat eenfack Leven vun de Bevölkerung in eng Gemeenschap mit dat Veeh, dat he in verklärt Mörgen- oder Abendlucht wiest. Wiel sien Bilder up dat footen, wat he sülvst beleevt hett, hett he in hooch Gloovwürdigkeit reckt. Se weern schienbar realistisch, togliek aber idealiseert un hemm dormit ok dat dormals verstärkte Bedürfnis vun de Norweger nah natschonaler Sülvstdorstellen entspraaken.

Kooi hemm en groot Rull in disse Biller speelt. Askevold sien Anliggen weer dat aber, Landschap Veeh un Minsch in hör harmonisch Tosommenwirken to wiesen un kien een vun disse Elemente in den Vörgergrund to schuuven. De Kooi wurrn weder in en langwieligen Ruhetostand noch in besünners dramatisch Bewegen wiest, sonnern bi lütt narrativen Ereegnissen as bi dat Tränken oder bi de Överfohrt över den Fjord in‘ Toog vun den Albup- oder Afdrieven. Dat leeg nich in sien Afsicht, up soziale oder politische Probleme hentwiesen. Dat hemm hüm Kritiker nahderhen vörschmeeten. Se hemm Askevold gern as „Koohmaler“ afdoon un vertellt, sien Biller harr he nach de Tall vun de afbildt Kooi kalkuleert.

In de allgemeen künstlerisch Umbrööktiet um 1880 hemm sück Malwies un Thematik ok vun sien Biller ännert. Dat Koohthema hett he nu upgeven un hett sück nu starker mit de Fjordmaleree befaat. Besünners gern un faken hett he Szenen in Voss, an‘ Sognefjord un Hardangerfjord malt. Sien Malwies wurr pastoser un weniger detailleert, sien Farven wurrn blasser un köhler. Sien Fjordlandschapen wurrn van Inheimischen bevölkert, man sücht Siedlungen an dat Ufer, af un to is ok mal en Damper to sehn. Disse Biller wirken as Vedute vun real Oörd, sünd aber komponeert.

De in de lateren Johren entstahn Biller ähneln annanner faken. De Oorsaak is in den Köperkreis to söken, de siet den 1880er Johren hööftsächlich ut Touristen bestunn, de dat Land vun en Krüüzfohrtschipp to sehn kreegen un in de Biller Reiseerinnerungen sehn deen. As völ norweegsch Maler leev he later överweegend in Düsseldörp, vun wo ut de Biller beter to verkoopen ween as in Norwegen. All fröher weer he dorto övergahn, Biller ok to minner Priesen noch mal to malen.

Neben den Atelierbillern in grötter un mittleren Formaten hett Askevold ok lüttgere Freeluchtstudien malt, de siet de Romantik tonehmend anseggt weern un sück ok verkoopen leeten. De vun den Impressionismus beinflooten Kunsthistoriker schätzen bit hüüd disse Biller mehr as sien Atelierbiller. En Reeg vun disse Studien befind sück in dat Natschonalmuseum Oslo.

Warkbispeelen

• Sommertag am See mit Kühen, 1876, 112×218 cm, Natschonalmuseum Oslo
• Einschiffung von Kühen, 1869, 62×97 cm, Kunstmuseum Bergen
• Kühe im Wald, 1870, 44m3×62 cm, Kunstmuseum Bergen
• mehrere Gemälde befinnen sück in’ Besitt vun den Blomqvist Kunsthannel in Oslo
• mehrere Bilder befinnen sück in de Sammlung vun de Baronie Rosendal

Literatur

• Magne Malmanger: Anders Askevold. Fra fjord til fonn. Rosendal, 1993.
• Siegfried Weiss: Der Maler Anders Monsen Askevold (1834–1900). In: Heimat-Jahrbuch Wittlaer, Bd. 27 (2006), S. 144–149.

Kiek ok

List vun Maler vun de Düsseldörper Malerschool

Weblenken

Anders Askevold. Mehr Biller, Videos oder Audiodateien to’t Thema gifft dat bi Wikimedia Commons.