Alternanz (Goornbo)

Ünner Alternanz oder ok Alternatschoon warrt in’n Goornbo de ünnerscheedlich Oornbüüt bi Aaftbööm in’n tweejohrigen Wessel betekent.

Bi Appel föhrt dat to de so nöömten Appel-Johren, de sik jümmer afwesselt mit de Johren mit lütte Büüt. De Produkschoon vun Aaft is dordör mitünner nich weertschopplich, wiel de Gewinn in de Appel-Johren vun wegen dat rieke Anbott lütt is, man dorna de Gewinn groot weer, man weniger Appel an’n Boom sitt.

De Saat vun veele fruchtende Bööm, as ok de noch wassenden Drievspitzen, billt Plantenhormonen (Phytohormonen), welke dat Differenzeeren vun de Blötenknuppen na en riek Johr minnert oder hinnert. Af un to is de Blötenknuppendifferenzeeren för dat nafolgend Johr al en poor Weken na de Blööt to Enn. Dormit is för en gliekmatig Büüt en to hoge Tall an Blötenknuppen anleggt worrn. De Tall vun de sik entwickelnde Blöten kann in so en Fall dör slecht Befruchten, en cheemsch Utdünnen oder en anpassten Snitt broken warrn. Passeert in’n Gegensatz dorto de Differenzeeren eerst laat, kann dör en Utdünnen vun de Frücht vun Hand en utrekende Tall Blötenknuppen för’t nächste Johr bewohrt warrn.

Verbreedt is de Alternanz bi Appel, Beern un Oliven. Bi de eersten ümfaat dat den helen Boom, wieldat bi de Oliven blots de drägenden Twieg bedrapen sünd. De nich-drägenden sett in’n Johr dorop wedder Knospen an. De Buern, de dat al wat länger maakt, sniedt de Olivenbööm glieks bi de Oorn. So künnt se de Twieg, de dragen hebbt – sowiet dat Sinn maakt – wegsnieden un de annern stahnlaten, dat se dat nächste Johr goot drägen künnt.

Ünner de Appelsorten sünd sünners Elstar, Boskoop oder Delbarestivale as anfallig för Alternanz bekannt.